Një kandidat i forcave speciale amerikane “Navy SEAL” vdiq dhe një i dytë është shtruar në spitalin San Diego.

Kjo, pasi përfunduan atë që njihet si “Java e Ferrit”. Kandidatët kalojnë përmes një faze fillestare, rraskapitëse të trajnimit për një nga njësitë ushtarake më elitare të Amerikës.

Emri i praktikantit të vdekur ende nuk është bërë i ditur. Marina tha se do të bëhet fillimisht njoftimi i familjes.

Në një deklaratë zyrtare, komanda e Luftës Speciale Detare tha se po hetohen shkaqet e vdekjes.

Mediat amerikane raportojnë se kandidati vdiq në Spitalin Sharp Coronado në Coronado, Kaliforni, më 4 shkurt.

Detarët nuk po stërviteshin në mënyrë aktive kur raportuan simptoma dhe u transportuan për të marrë kujdes urgjent.

Gjatë “Javës së Ferrit”, kandidatët e SEALS-ve marrin pjesë në një sërë ushtrimesh trajnimi me intensitet të lartë, ndërkohë që u jepet shumë pak mundësi për të fjetur.

Në vitin 2016, u raportua gjerësisht vdekja e Derek Lovelace, i cili u mbyt gjatë një stërvitjeje në pishinë.

Të dhënat e marinës treguan asokohe se ai ishte praktikuesi i pestë në katër muaj që humbi vetëdijen gjatë një stërvitjeje në pishinë.

Marina thotë se vetëm një në pesë kursantë e kalon këtë kurs të mundimshëm, i cili prodhon rreth 200 deri në 250 SEAL në vit.

Sipas raportimeve të lajmeve, 17 SEAL që ia dolën të kalonin kursin vdiqën në aksidente stërvitore gjatë dy dekadave të fundit.