Rinia Demokratike e Kosovës (PDK) ka organizuar grumbullim të ndihmave elementare rroba dhe batanije për t’i dal në ndihmë të prekurve nga tërmeti në Shqipëri, raporton Ekonomia Online.

Ndihmat familjeve të prekura nga tërmeti në Shqipëri, ka sjellë edhe kreu i PDK-së, Kadri Veseli. Ai me këtë rast ka inkurajuar të gjithë qytetarët që të ndihmojnë sa të kenë mundësi.

“Republika e Kosovës është duke ndërmarrë çdo veprim që ta tejkalojmë këtë situatë për termet në Shqipëri dhe institucionet e Kosovës tanimë kanë dërguar FSK-në dhe Policinë, kemi ndarë edhe një ndihmë prej 500 mijë euro për familjet e goditura nga ky termet dhe ky aksion vullnetar i Rinisë Demokratike të Kosovës në tërë Kosovën është i mirëpritur”.

“Inkurajoj gjithë qytetarët të ndihmojnë me aq sa kanë mundësi. Bashkëndjejë me familjet që kanë pasur fatin tragjik të pësojnë nga ky tërmet dhe dashtë Zoti që të tejkalohet me kaq që mos të ketë edhe më shumë”, tha ai.

Veseli tha se është në kontakt me institucionet e Shqipërisë, ku tha se gjendja atje është e rëndë, raporton EO.

“Jemi në kontakte intensive me gjitha institucionet e Shqipërisë, vërtetë është një gjendje e rëndë për faktin se tërmeti përveç pasojave të cilat lënë është edhe aspekti psikologjik i traumave dhe e kemi ndjerë edhe këtu në Kosovë”, ka thënë Veseli.

Ndihmat e grumbulluara do të nisen për në Shqipëri në mbrëmje.