Kryetari i Kuvendit të Republikës së Kosovës, Kadri Veseli, ka filluar vizitën e tij në Shqipëri me takimin me presidentin e Republikës, Ilir Meta.

Kryeparlamentari Veseli dhe presidenti Meta diskutuan gjerësisht për marrëdhëniet midis dy shteteve, tashmë të konsoliduara në çdo fushë, me përkushtimin e përbashkët për t’i thelluar më tej.

Kreu i Kuvendit të Kosovës potencoi edhe njëherë rolin krucial të Shqipërisë si në fazën e luftës dhe të shtetkrijimit, ashtu edhe të konsolidimit të shtetësisë dhe forcimit të subjektivitetit ndërkombëtar të saj.

Veseli tha se Kosova dhe Shqipëria tashmë e kanë të qartë aspiratën dhe rrugën të cilën duhet ndjekur për të arritur synimin e përbashkët – integrimin euroatlantik.

Kryetari i Kuvendit tha se Kosova është në pritje të hapit vendimtar të Bashkimit Evropian për të liberalizuar vizat për qytetarët e Kosovës, si një e drejtë e merituar e tyre dhe e shtetit të Kosovës.

Presidenti Ilir Meta, nga ana e tij, përgëzoi kryeparlamentarin Veseli për vendimet e kohëve të fundit të Kuvendit të Kosovës, të cilat, sipas tij, i kanë hapur mundësi të reja shtetit të Kosovës në raport me Bashkimin Evropian.

Meta tha se Shqipëria vazhdon të mbetet në krah të Kosovës në të gjitha sfidat që ajo ka para vetes dhe se i gëzohet çdo arritjeje të saj, si në planin e brendshëm, ashtu edhe në rrafshin ndërkombëtar.

Veseli më pas është takuar edhe me homologun e tij, Gramoz Ruçi.

Ndërsa nesër kryeparlamentari Veseli do të marrë pjesë Lutjet e Mëngjesit, të cilat sivjet mbahen në kryeqytetin shqiptar, Tiranë.

Ky aktivitet është organizuar nga Kuvendi i Shqipërisë, në të cilin pritet të marrin pjesë kryetarë të parlamenteve nga vendet e rajonit dhe të ftuar të tjerë të shumtë.