Kryetari i PDK-së, Kadri Veseli dhe i nominuari për kryeministër nga koalicioni parazgjedhor PDK-AAK-NISMA, Ramush Haradinaj kanë zhvilluar një bashkëbisedim me studentët e kolegjit UBT.

Veseli ka thënë se ka ngecje në krijimin e vendeve të punës, në zhvillimin ekonomik dhe ka stagnim në procesin e integrimeve euroatlantike.

Duke mos pasur prosperitet, Veseli ka thënë se legjitimitetin e qeverisjes në Qeveri dhe Kuvend, kanë vendosur ta bartin te sovrani, tek qytetarët e vendit, të cilët duhet të vendosin për një Fillim të Ri.

“Koncepti i Fillimit të Ri i duhet Kosovës, për rininë, që të mund të konkurrojë me rininë e të gjithë botës. Unë jam i nderuar të flas për Fillimin e Ri me mikun tim, kryeministrin e ardhshëm të Kosovës. Qytetarët e Kosovës dhe detyra po e pret që Haradinaj të jetë kryeministër i Kosovës”, tha Veseli.

Ai tha tutje se rinia është aset më i mrekullueshëm i Kosovës. Veseli ka folur edhe për egon në politikë, e cila sipas tij i ka lodhur qytetarët e vendit, andaj edhe ai ka zgjedhur të bashkohet në koalicion me AAK dhe Nismën. Ish-kryeparlamentari ka premtuar ndihmë edhe për fermerët dhe rritje të GDP-së së Kosovës.

“Me 11 qershor pyetja do të jetë, cila do të jetë e ardhmja e këtij vendi? Me këtë vizion që e biseduam, të integruar plotësisht në Bashkimin Evropian. Apo një koncept, i cili duke përfituar edhe nga gabimet, dëshiron ta rrënojë gjithë atë që është arritur deri tash, partneritetin me bashkësinë ndërkombëtare. Ju duhet të lejoni që Kosova të ecë prapa, të mos stagnojë. Ju duhet të jeni përkrah një vizioni për transformimin të fuqishëm ekonomik, dhe ka edhe guxim për veprime”, u shpreh ndër tjerash Veseli.