Ambasadorja gjermane në Kosovë, Angelika Viets, gjatë pritjes me rastin e shënimit të 26-vjetorit të Ditës së Bashkimit të Gjermanisë në Vila Gërmia, ka mbajtur një fjalim.

Ajo ka theksuar se ekzistojnë shumë mënyra, të cilat do t’i lehtësonin investimet në Kosovë, duke i zvogëluar pengesat byrokratike dhe përshpejtuar kohën për regjistrimin e një ndërmarrjeje.

Gjithashtu ajo ka theksuar se luftimi i korrupcionit dhe forcimi i sundimit të ligjit po ashtu do t’i rriste mundësitë për investime.

“Për këtë unë dëshiroj t’i përgëzoj investitorët për përkushtimin e tyre për zhvillimin ekonomik të Kosovës. Shpresoj po ashtu që qeveria do të vazhdojë të përmirësojë kushtet për investime, në mënyrë për të nxitur zhvillimin ekonomik të Kosovës”, ka thënë ajo.

Ambasadorja Viets, ka theksuar se hyrja në fuqi e Marrëveshjes së Stabilizim Asociimit ka shënuar një hap të madh përpara për Kosovën në rrugën e saj drejt BE-së, “por tani marrëveshja duhet të zbatohet”.

 

Fjalimi i plotë i ambasadores Viets:

 

“I nderuar President,

Kryetar Kuvendit,

Deputetë të Kuvendit,

Kryeministër, Ministra,

Shkëlqesi, zonja dhe zotërinj,

për mua është një nder i madh që mund të Ju uroj mirëseardhje sonte në Vila Gërmia. Kjo e hënë ka shënuar 26-vjetorin e ribashkimit të Gjermanisë. Është një përvjetor gazmor, të cilin ne dëshirojmë ta festojmë sonte me Ju – miqtë dhe partnerët tanë.

Njëzet e gjashtë vjet ribashkim do të thotë që tani një gjeneratë e tërë është rritur në Gjermaninë e bashkuar – dhe në një Evropë të bashkuar. Para dhe veçanërisht pas ribashkimit, Gjermania ka qenë thellësisht e përkushtuar për projektin evropian. Pa mbështetjen e partnerëve tanë evropianë, Gjermania e tanishme, e bashkuar nuk do të kishte qenë e imagjinueshme.

Shumë nga të arriturat e Bashkimit Evropian, si paqja, stabiliteti dhe prosperiteti mund të duken të vetëkuptueshme për gjeneratat e reja, sepse ato janë rritur me to. Festimi i Ditës së Bashkimit të Gjermanisë dhe përkujtimi i ndarjes së vendit tonë – dhe Evropës – shërben për të na kujtuar se këto të arritura nuk do të duhet të ishin të vetëkuptueshme.

Në letrën e tij të urimit drejtuar Kancelares Merkel, Kryeministri Mustafa ka thënë se këto zhvillime kishin pasur ndikim të drejtëpërdrejtë në frymëzimin e popullit të Kosovës për demokratizim dhe krijimin të një shteti të pavarur.

Vitin e kaluar Evropa u ballafaqua me shumë sfida. Një valë e paparë e refugjatëve dhe migrantëve erdhi në Gjermani duke kërkuar strehim dhe një të ardhme më të mirë. Sulme barbare terroriste shkatërruan një numër qytetesh të Evropës. Unë jam e bindur se këto sfida tregojnë më mirë se gjithçka tjetër që Evropa duhet të jetë e bashkuar, në mënyrë për t’i tejkaluar sfidat e sotme dhe që zëri i saj të dëgjohet.

Për këtë arsye, Gjermania mbetet e përkushtuar për projektin evropian, si dhe për procesin e integrimit evropian të Ballkanit Perëndimor, përfshirë edhe Republikën e Kosovës. Hyrja në fuqi e Marrëveshjes së Stabilizim Asociimit ka shënuar një hap të madh përpara për Kosovën në rrugën e saj drejt BE-së. Tani marrëveshja duhet të zbatohet me tërë kompleksitetin e Acquis Communautaire të BE-së. Unë jam e bindur që Kosova do të mbetet e përkushtuar për këtë proces dhe do të vazhdojë punën e saj të madhe. Mund t’Ju siguroj se Gjermania do të vazhdojë të mbështes Kosovën në këtë rrugë.

Përshtatja e legjislacionit me acquis të BE-së në pjesën më të madhe është një proces teknik, ndonëse integrimi evropian nënkupton shumë më shumë. BE-ja nuk karakterizohet vetëm me të drejta kontraktuale, por ç’është më e rëndësishmja me ide dhe vlera të përbashkëta. Megjithë tërë përpjekjet dhe konfliktet e brendshme, BE-ja është ndërtuar mbi një konsensus dhe kompromis. Kjo jo vetëm që është ankoruar në mekanizmat e BE-së, por është poashtu edhe pjesë e kulturës politike të BE-së.

Një union prej gjer më tani 28 shteteve anëtare mund të funksionojë vetëm nëse të gjitha palët me seriozitet punojnë drejt zgjidhjeve të përbashkëta, megjithë dallimet që ekzistojnë. Ky kapacitet nuk është thelbësor vetëm për BE-në. Kapaciteti për dialog dhe kompromis është thelbësor për secilën demokraci.

Për këtë arsye unë jam e brengosur për bllokadën politike në Kuvendin e Kosovës në të shumtën e kohës së vitit të kaluar. Gazi lotsjellës dhe dhuna nuk kanë vend në demokraci e aq më pak në parlament. Informimi transparent dhe debati i hapur lidhur me çështje politike janë pjesë përbërëse e demokracisë. Prandaj unë i inkurajoj të gjithë akterët politikë të qeverisë dhe opozitës për të punuar drejt krijimit të një kulture politike për dialog konstruktiv për të çuar vendin tuaj përpara dhe për të mirëpritur iniciativa të reja. Një kulturë e tillë politike nuk do të ndihmojë në zgjidhjen e çështjeve kontroverse, por do të ishte një aset i rëndësishëm në rrugë drejt Bashkimit Evropian.

Zonja dhe zotërinj,

Jam e lumtur të them që në muajt e kaluar janë shënuar një sërë suksesesh të investimeve gjermane në Kosovë, të cilat e kanë fuqizuar potencialin ekonomik të këtij vendi. Të hënën është botuar një seri e artikujve – të shkruar nga studentë të gazetarisë – në të përditshmen Koha Ditore. Ata kanë portretizuar disa nga këto “tregime të suksesit” në sektorë të ndryshëm, si inxhiniering civil, prodhim i paneleve diellore, prodhim i artikujve ushqimor, qendër e thirrjeve dhe teknologji informative.

Në të shumtën e rasteve këta investitorë janë sipërmarrje të mesme që në gjermanisht njihen me termin “Mittelstand”, të cilët investojnë në Kosovë. Shumë nga këto ndërmarrje kanë lidhje familjare me Kosovën dhe diasporën kosovare. Mirëpo ajo çfarë ato kanë të përbashkët, është se ato të gjithë janë ballafaquar me dhe i kanë tejkaluar sfidat për të arritur sukses në Kosovë. Disa nga ato sfida natyrisht kanë qenë sfida të ndërlidhura me biznesin dhe janë normale, kur një ndërmarrje e shtrinë veprimtarinë e saj në një vend të ri, në një treg të ri dhe ka nevojë për t’u vendosur.

Megjithatë ekzistojnë shumë mënyra, të cilat do t’i lehtësonin investimet, për shembull duke i zvogëluar pengesat byrokratike dhe përshpejtuar kohën për regjistrimin e një ndërmarrjeje. Luftimi i korrupcionit dhe forcimi i sundimit të ligjit poashtu do t’i rriste mundësitë për investime. Për këtë unë dëshiroj t’i përgëzoj investitorët për përkushtimin e tyre për zhvillimin ekonomik të Kosovës. Shpresoj po ashtu që qeveria do të vazhdojë të përmirësojë kushtet për investime, në mënyrë për të nxitur zhvillimin ekonomik të Kosovës.

Para se të përmbyll fjalimin tim, ju lutem më lejoni të shpreh falënderimin tim për sponzorët e mbrëmjes së sotme: AHP Volkswagen, Jaha Group, Pro Credit Bank dhe Siemens. Pa mbështetjen e tyre kjo mbrëmje nuk do të kishte qenë e mundur.

Një “falënderim të veçantë” ia shpreh korpusit ushtarak muzikor dhe Kolonel Lejtnant Kahle, paraqitjen e shkëlqyeshme të të cilëve kemi kënaqësinë ta shijojmë sonte. E çmoj shumë faktin që e keni vazhduar qëndrimin Tuaj në Kosovë për të qenë sonte këtu me ne.

Do të dëshiroja gjithashtu të faIënderoj personelin tim dhe Vila Gërminë për përkushtimin dhe punën e madhe që kanë bërë, duke siguruar që ne mund të kalojmë një kohë të këndshme sonte së bashku.

Është kënaqësi e veçantë për mua të ngre dolli për Presidentin e Republikës së Kosovës”.