Presidenti serb Aleksandar Vuçiq, gjatë fjalës së tij në Asamblenë e Përgjithshme të Kombeve të Bashkuara në seancën e 77-të, ka thënë se Serbia respekton integritetin territorial të Ukrainës.

Ai tha se mbështet integritetin territorial të të gjithë anëtarëve, përfshirë Ukrainën, teksa gënjeu kur tha se “Serbia s’e ka shkelur territorin e askujt”, ku pyeti se cili është ndryshimi mes integritetit territorial të Ukrainës dhe integritetit territorial të Serbisë, që sipas tij, u shkel më 1999.

“Pikërisht për shkak të asaj që ka përjetuar dhe po përjeton Serbia, kam të drejtë të citoj fjalët e mëposhtme si përkujtues dhe paralajmërim për të gjithë ne: “Padrejtësia e kryer kudo është kërcënim për drejtësinë kudo”. Pavarësisht se ende po i ndjejmë pasojat, ne nuk po heqim dorë nga parimet e Kombeve të Bashkuara”, tha Vuçiq, shkruan Danas.

Tutje, Vuçiq tha se Serbia është e durueshme dhe me shumë vullnet në kërkim të kompromisit për Kosovën, nën kujdesin e BE-së në kuadër të dialogut Kosovë – Serbi.

Është, siç tha ai, një proces i vështirë, ka më shumë se dhjetë vjet, por Serbia nuk sheh alternativë tjetër.

“Është më mirë të negociosh për njëqind vjet sesa të luftosh për një ditë. Jam i bindur se do të arrijmë një zgjidhje të pranueshme reciproke, të bazuar në kompromis, sepse kjo është absolutisht e vetmja mënyrë për të arritur qëllimin tonë, që është vendosja e paqes afatgjate, si parakusht për një jetë të begatë për serbët dhe shqiptarët në rajonin tonë. Tashmë i kemi ezauruar të gjitha opsionet e tjera dhe të paktën sa i përket Serbisë, nuk ëndërrojmë të kthehemi në rrugën e konfliktit dhe gjakderdhjes”, tha presidenti i Serbisë.

Sipas fjalëve të tij, rajoni i Ballkanit nuk mund të përballojë një konflikt tjetër dhe për këtë ai beson se do të ketë vullnetin dhe mirëkuptimin e partnerëve ndërkombëtarë për këtë, pasi siç tha ai, ata e dinë shumë mirë se disa vendime të mëparshme të qeverive të tyre kanë qenë keq dhe se nuk punuan për të ardhmen e rajonit tonë dhe paqen botërore.

Siç tha ai, është i bindur se popujt e Ballkanit kanë kapacitet për të vazhduar bashkëjetesën në të ardhmen si miq dhe partnerë që kanë një vizion të përbashkët për anëtarësimin në një Evropë të bashkuar.

“E di mirë këtë, sepse tashmë kemi kapërcyer shumë barriera që qëndruan mes popujve tanë për vite me radhë dhe na kushtuan mijëra jetë dhe një të ardhme të humbur. Serbia dhe Shqipëria, për shembull, sot kanë marrëdhëniet më të afërta dhe më miqësore në historinë e tyre të përbashkët shekullore në Gadishullin Ballkanik”, theksoi Vuçiq.

Ai më tej tha se duhet folur me maturi dhe pragmatike për të ardhmen, jo për të kaluarën.

“Le të flasim se si të zgjidhim problemet që mundojnë njerëzit tanë, kompanitë, punëtorët, studentët dhe sipërmarrësit tanë. Ne diskutuam shumë dhe dolëm me zgjidhje të shumta që tashmë kanë hequr barrierat që ekzistonin mes nesh pa ndonjë arsye racionale. Para së gjithash në ekonomi, tregti dhe fluksin e njerëzve dhe kapitalit. Për tre vjet, Serbia, Shqipëria dhe Maqedonia e Veriut kanë zbatuar projektin “Ballkani i Hapur”, i cili ka një ide të qartë – të hapë rajonin për njerëzit, për mallrat, shërbimet, për kapitalin dhe kompanitë, për të marrë një zonë që do të jetë përgjithmonë pa tensione, tensione dhe konflikte”, është shprehur Vuçiq.

Në fund ai u ka bërë thirrje anëtarëve të Asamblesë së Përgjithshme të OKB-së që ta respektojnë siç tha ai Kartën e OKB-së, por gjithashtu ka kujtuar se ajo nuk është respektuar në rastin e Serbisë.