Komisioneri i Komisionit Qendror të Zgjedhjeve (KQZ), Bledar Hasku, është deklaruar i pafajshëm për cenim të fshehtësisë së votimit.

Ai akuzohet se në zgjedhjet e parakohshme parlamentare që janë mbajtur më 6 tetor 2019, në Kosovë, në shkollën fillore “Xhelal Hajda Toni”, në Rahovec, në mënyrë të kundërligjshme cenon fshehtësinë e votimit, raporton “Betimi për Drejtësi”.

Në aktakuzë thuhet se ai në cilësinë e komisionerit të KQZ-së, gjatë procesit nga lista e votuesve me telefon ka fotografuar rreth dhjetë emra, e më pas, përmes rrjetit social “Facebook”, ia ka dërguar një personi tjetër.

Në seancën fillestare të mbajtur të premten, në Gjykatën Themelore në Gjakovë, pas leximit të aktakuzës nga prokurori Ramiz Buzhala, i akuzuari Hasku deklaroi se nuk e pranon fajësinë për veprën penale me të cilën ngarkohet.

Më pas, meqenëse i akuzuari nuk e ka pranuar fajësinë, gjykatësi Gëzim Pozhegu seancën e shqyrtimit të dytë e ka caktuar që të mbahet më 16 dhjetor, në ora 10:00, derisa e ka njoftuar të akuzuarin se ka të drejtë t’i paraqesë kundërshtimet lidhur me provat si dhe kërkesën për hudhjen e aktakuzës.

Sipas aktakuzës së Prokurorisë Themelore në Gjakovë, e ngritur më 29 tetor 2019, Bledar Hasku po ngarkohet me veprën penale “cenim i fshehtësisë së votimit” nga neni 215 paragrafi 3 lidhur me paragrafin 1 të KPRK-së.

Sipas aktakuzës, më 6 tetor 2019, rreth orës 16:00, në Rahovec, pikërisht në vendvotimin e vendosur në shkollën fillore “Xhelal Hajda Toni”, në mënyrë të kundërligjshme cenon fshehtësinë e votimit në zgjedhjet nacionale për vitin 2019 për deputetë të Kuvendit të Republikës së Kosovës, në atë mënyrë që i pandehuri në cilësinë e komisionerit të KQZ-së, ditën kritike gjatë procesit nga lista e votuesve, me telefon ka fotografuar rreth dhjetë emra, e më pas ia ka dërguar përmes rrjetit social Facebook, shokut të tij Minir Vuqiterna.