Drejtuesit e Ministrisë së Infrastrukturës e Transportit dhe të Komunës së Suharekës, të premten, kanë nënshkruar memorandum mirëkuptimi për përkrahjen e financimit të ndërtimit të sheshit në Suharekë. Vlera e projektit në këtë memorandum figuron të jetë 1 milion euro. Me këto mjete parashihet ndërtimi i rrugës “Brigada 123” respektivisht sheshi i qytetit.

Kryetari i Komunës së Suharekës, Bali Muharremaj, ka theksuar se nga lidershipi i MIT-it është marrë zotimi për përkrahjen financiare prej 1 milion eurosh për sheshin e qytetit, shkruan sot Koha Ditore.

Ndërsa ministri i MIT-it, Pal Lekaj, ka vlerësuar se e premtja ka filluar me lajm të mirë për Suharekën. “Kryetari i kësaj komune, Bali Muharremaj, mori zotimin për përkrahje financiare nga Ministria e Infrastrukturës dhe Transportit, në ndërtimin e sheshit të Suharekës “Brigada 123”. Jemi pranë secilës komunë, për të mirën e qytetarëve”, ka bërë të ditur Lekaj, në rrjetet sociale.
Muharremaj ka publikuar kopjen e memorandumit, ku në nenin 2 figuron se ndërtimi i rrugës “Brigada 123”-Sheshi i Suharekës kap vlerën 1 milion euro.