Vendimi Zyrës së Rregullatorit të Energjisë (ZRrE) për shtrenjtimin, rreth qind për qind, të energjisë elektrike ka irrituar qytetarët, të cilët thonë se do ta kenë të vështirë t’i paguajnë faturat me rritje, raporton Ekonomia Online.

Të mllefosur, disa kanë kërkuar ‘t’i vnohet dryni” këtij institucioni që do të duhej të ishte i pavarur dhe të merrte vendim në favor të qytetarëve dhe jo një kompanie private.

Qytetarë të intervistuar nga Ekonomia Online, thonë se këto çmimet dyfish më të shtrenjta do të jenë të papërballueshme për shumicën e konsumatorëve.

“Katastrofë! S’ki çka me thënë, keq boll! Vështirë e kanë qytetarët. Kurrqysh! Të gjitha të zezat popullata me i hjek, me të vërtetë është vështirë. ZRRE-në e kisha hjek krejt, ja kisha ngjit drynin e i kisha thënë ec shko në Serbi atje me ta ki punë. Ashtu ashtu po ia falin do para, kështu le të shkojnë ZRRE me ta”, ka thënë Hilmi Rrahmani për EO.

E Faik Rusinovci, e ka quajtur problem rritjen e faturave të energjisë. Thotë se është pensionist e do ta ketë të vështirë pagesën e faturave.

“Shumë problem është energjia me u rrit. Na duhet me pas energji të mjaftueshme për Kosovën. Me pension jo kurrë, me pension kurrë nuk mundem me pagu. I marrë 90 euro pension. Çka me pagu më përpara, a me pagu rrymën, a me pagu mbeturinat, a me pagu plot sene pa ndërpre. Unë nuk di se qysh do të mund të jetojnë, pa punë, problem”, u shpreh ai.

Kundër shtrenjtimit të energjisë elektrike është edhe Ismet Gashi. Ai thotë se shumica e qytetarëve nuk do të munden ta përballojnë këtë rritje.

“Mirë nuk është, çfarë miri kjo, kushtet qeveria po i sheh populli në çfarë gjendje të mjerueshme jeton, ne jemi kundër të energjisë elektrike”, u shpreh ai.

Ndërsa Arben Blakaj tha se rritja e energjisë elektrike vetëm për qytetarët është e tepërt. Kritika pati edhe për vendimin që bizneset të mos tarifohen në këtë rritje.

“Na jena populli më i varfër në Evropë edhe për neve është katastrofë. Me mujt disi me bë një zgjidhje tjetër më mirë kish qenë. Bizneset po falen po vetëm ne qytetarët që paguajmë taksa e që jemi taksapaguesit më të mëdhenj po dënohemi më së shumti”, tha ai