Bisedimet që synojnë fillimin e procesit të lirimit të pengjeve izraelite duket se do të fillojnë të hënën.

Egjipti ka rënë dakord të presë delegacione nga Izraeli dhe Hamasi nesër. Pritet që t’iu bashkohet edhe i dërguari amerikan Steve Witkoff.

Kryeministri izraelit Benjamin Netanyahu ka thënë se shpreson të njoftojë lirimin e pengjeve që mbahen në Gaza “në ditët në vijim” dhe Hamasi njoftoi të premten se do të kthejë të gjithë pengjet e mbetura në Gaza, të vdekur dhe të gjallë.

Grupi tha gjithashtu në një deklaratë se dëshiron të angazhohet në negociata për të diskutuar pika të mëtejshme në planin e paqes të presidentit amerikan.

Sekretari amerikan i Shtetit, Marco Rubio, tha se Hamasi kishte rënë dakord “në parim” për atë që do të ndodhte pasi të mbaronte lufta në Gaza, por ai paralajmëroi se faza e dytë e marrëveshjes, e cila ka të bëjë me çarmatimin dhe çmobilizimin e Hamasit, “nuk do të jetë e lehtë”.

“Do ta dimë shumë shpejt nëse Hamasi është serioz apo jo nga mënyra se si do të shkojnë këto bisedime teknike për sa i përket logjistikës”, shtoi Rubio.

Rrugës për në një aktivitet të Marinës Amerikane të dielën, Trump u tha gazetarëve se mezi priste “paqen në Lindjen e Mesme për herë të parë në rreth 3,000 vjet”.

Ai tha se plani i paqes ishte “një marrëveshje e shkëlqyer për Izraelin” dhe se “njerëzit janë shumë të lumtur për të”.

Përparimi në diskutimet në Kajro do të varet kryesisht nga fakti nëse grupi militant do të bjerë dakord me hartën e tërheqjes së Uashingtonit, tha një zyrtar palestinez pranë bisedimeve për Reuters.

Trump publikoi një hartë që tregon zonat e Gazës nga të cilat Forcat Mbrojtëse Izraelite do të duhet të tërheqin trupat e tyre, për të cilat ai tha se ishte rënë dakord tashmë nga Izraeli.

Aktualisht, ushtria izraelite ka mbuluar rreth 80% të enklavës në atë që e quan “zonë e rrezikshme luftimi”.

Nëse plani i paqes ndjek kufijtë e treguar në hartë, tërheqja fillestare e Izraelit do ta linte Gazën rreth 55% të pushtuar, ndërsa tërheqja e dytë do ta linte atë rreth 40% të pushtuar.

Pas fazës përfundimtare të tërheqjes, e cila do të krijonte një “zonë tampon sigurie”, rreth 15% e Gazës do të pushtohej nga ushtria izraelite, shkruan Skynews,