Presidenti rus Vladimir Putin e ka përdorur fjalimin e tij vjetor të Ditës së Fitores në Sheshin e Kuq të Moskës për të justifikuar luftën e tij në Ukrainë dhe për të denoncuar NATO-n.

Duke folur para qindra ushtarakëve dhe i shoqëruar nga disa udhëheqës botërorë, presidenti rus tha se po luftonte një luftë “të drejtë” dhe e quajti Ukrainën një “forcë agresive” që po “armatoset dhe mbështetet nga i gjithë blloku i NATO-s”.

Komentet e tij vijnë mes festimeve të heshtura në pjesë të Rusisë për të shënuar festën më të madhe kombëtare të vendit, e cila përkujton fitoren e Bashkimit Sovjetik ndaj Gjermanisë naziste, raporton BBC.

Përpara festimeve, Rusia dhe Ukraina ranë dakord të respektojnë një armëpushim tre-ditor, i cili u njoftua nga Presidenti i SHBA-së Donald Trump të premten.

Për herë të parë në gati dy dekada, asnjë pajisje ushtarake nuk u shfaq në paradën e Ditës së Fitores në Moskë.

Por nën masa të rrepta sigurie, personeli ushtarak marshoi në masë nëpër Sheshin e Kuq.

Duke iu drejtuar turmës, Putin e filloi fjalimin e tij duke përkujtuar sakrificat e ushtarëve të BRSS gjatë Luftës së Dytë Botërore.

“Bëma e madhe e brezit të fitimtarëve frymëzon ushtarët që zbatojnë qëllimet e operacionit special ushtarak sot”, tha ai, duke iu referuar luftës në Ukrainë.