Kryeqyteti ukrainas, Kievi, u godit nga sulme ruse me dronë dhe raketa, duke lënë të vdekur një person dhe të paktën katër persona të plagosur, duke shkaktuar dëme në disa ndërtesa banimi.

Sipas autoriteteve ukrainase, një pjesë e një objekti banesor në distriktin Darnytskyi u shemb pjesërisht, ndërsa dyshohet se disa persona kanë mbetur nën rrënoja, raporton Reuters, transmeton Klankosova.tv.

Kryetari i Kievit, Vitali Klitschko, tha se disa të lënduar po marrin trajtim në spital, ndërsa ekipet e emergjencës vazhdojnë operacionet e kërkim-shpëtimit.

Pamjet nga vendi i ngjarjes treguan ndërtesa të dëmtuara, zjarr dhe ekipe shpëtimi që largonin rrënojat pas sulmit.

Sulmet vijnë një ditë pasi Rusia kreu një tjetër valë sulmesh me dronë ndaj infrastrukturës kritike në Ukrainë, ku humbën jetën të paktën gjashtë persona.