Mbrojtësi i Arsenalit, William Saliba, është kthyer në stërvitje me Përfaqësuesen e Francës në prag të ndeshjes së parë të Botërorit që po zhvillohet në SHBA, Meksikë dhe Kanada.

Saliba në ditët e fundit ka pasur probleme të vazhdueshme me shpinë dhe kjo ka bërë që t’i mungojë Francës në disa stërvitje.

Mediumet franceze kanë raportuar të dielën se qendërmbrojtësi Saliba pritet të luajë startues në ndeshjen hapëse.

Franca luan të martën ndaj Senegalit nga ora 21:00.

Franca është në Grupin I së bashku edhe me Norvegjinë dhe Irakun.

Mësohet se pas përfundimit të Botërorit, 25-vjeçari mund të ketë nevojë për t’iu nënshtruar një ndërhyrjeje kirurgjikale.

Në rast se i nënshtrohet operimit, francezi mund t’i mungojë Arsenalit në ndeshjet e para të edicionit të ri në Premier League.