Lionel Messi kundër Mohamed Salah.

Dy emra të mëdhenj të futbollit botëror, dy ikona kombëtare dhe dy histori krejt të ndryshme në Kupën e Botës.

Argjentina do të përballet me Egjiptin të martën në Atlanta, në orën 17:00 sipas kohës lokale, në një duel që vlen një vend në çerekfinalet e Kupës së Botës 2026.

Por kjo sfidë është edhe një përballje mes dy prej lojtarëve më të mëdhenj të gjeneratës së tyre: Lionel Messit dhe Mohamed Salahut.

Messi, 39 vjeç, dhe Salah, 34 vjeç, ndodhen në fazën e fundit të karrierës së tyre të jashtëzakonshme.

Kapiteni argjentinas ka lënë të kuptohet se ky mund të jetë Botërori i tij i fundit, ndërsa Salah ende shpreson të jetë pjesë e turneut të vitit 2030.

Historia e tyre në Kupën e Botës ndryshon shumë.

Messi tashmë e ka fituar trofeun më të rëndësishëm në futboll.

Ai është golashënuesi më i mirë në historinë e Botërorit, lojtari me më shumë paraqitje në këtë kompeticion dhe një nga golashënuesit kryesorë të këtij turneu, raporton Andy Cryer, gazetar i BBC Sport, transmeton Klankosova.tv

Për Salahun, rruga ka qenë shumë më e vështirë. Në paraqitjen e tij të tretë në Kupën e Botës me Egjiptin, ai më në fund ka arritur fazën me eliminim direkt. Kombëtarja egjiptiane është për herë të parë në historinë e saj në 1/8 e finales së Botërorit.

Gjatë karrierës së Salahut, Egjipti ka humbur dy finale të Kupës së Afrikës, në vitet 2017 dhe 2021. Sulmuesi i njohur ka pasur gjithashtu disa përplasje publike me Federatën Egjiptiane të Futbollit për çështje si të drejtat e imazhit, organizimi i udhëtimeve dhe menaxhimi i ekipit.

Megjithatë, penalltia e tij “Panenka” në fitoren ndaj Australisë pas goditjeve të 11-metërshave i dha Egjiptit një moment historik. Tani Salah shpreson që sfida ndaj Argjentinës dhe Messit të bëhet kapitulli më i madh i karrierës së tij në Kupën e Botës.

Një duel mes një kampioni bote dhe një kapiteni që kërkon lavdinë e tij më të madhe.

Messi dhe Salah do të përballen për një vend në historinë e futbollit.