Në Gjykatën Themelore në Ferizaj po vazhdon shqyrtimi gjyqësor për rastin e vrasjes së rreshterit të Policisë së Kosovës, Muhamet Lika, ku prokurori Ismet Rrahmani, në fjalën e tij hyrëse, deklaroi se provat materiale dhe video-incizimet e kamerave të sigurisë dëshmojnë se vrasja ishte e planifikuar dhe se të akuzuarit kanë ndihmuar autorin e dyshuar para, gjatë dhe pas kryerjes së krimit.

Sipas prokurorit, 1 prilli i vitit 2025 kishte nisur si një ditë e zakonshme pune për rreshterin Muhamet Lika, i cili pas përfundimit të orarit të punës në Kaçanik, rreth orës 22:54, u nis drejt banesës së tij, por nuk arriti kurrë në destinacion.

“Arsyeja ishte se u privua nga jeta me armë zjarri nga i mituri Rejhan Bela”, ka thënë Rrahmani.

Ai theksoi se nga analiza e video-incizimeve të kamerave të sigurisë janë identifikuar personat e përfshirë në rast dhe se, sipas Prokurorisë, Rejhan Bela është autori i drejtpërdrejtë i vrasjes, ndërsa pesë të pandehurit e tjerë kanë vepruar në bashkëkryerje duke i ofruar ndihmë para, gjatë dhe pas ekzekutimit të krimit.

Prokurori u shpreh se provat, përfshirë video-incizimet, lokacionet dhe dëshmitë e dëshmitarëve, do të dëshmojnë se ngjarja nuk ishte spontane, por rezultat i një përgatitjeje të qëllimshme që kulmoi me vrasjen e rreshterit Lika.

“Duke u bazuar nga analizimi i të gjitha video-incizimeve të marra nga lokacionet e ndryshme për kohën, sikurse para, gjatë dhe pas kryerjes së veprës penale, do të vërtetohet se të pandehurit në bashkëkryerje, duke ndërmarrë veprime të caktuara, kanë qenë bashkëpjesëmarrës duke e ndihmuar përkatësisht Rejhan Bela. Një pyetje për të cilën prokuroria që nga fillimi, e po ashtu edhe familjarët e të viktimës Muhamet, dëshirojnë që e njëjta pyetje të marrë epilog si në seancën e sotme gjyqësore dhe gjatë seancave në vazhdim, është fakti se: koordinimi, lëvizja, dhe veprimet e caktuara të secilit të pandehur, vërtet a mund të përbëjnë ndonjë rastësi, apo kjo kishte një qëllim krejt tjetër të caktuar. Konsiderojmë se provat materiale, dëshmitë e dëshmitarëve, do t’i japin përgjigjen e duhur kësaj pyetje se vërtet këtu nuk ishte asgjë e rastësishme, nuk ishte asgjë spontane, por kishte një parapërgatitje të qëllishme që në fund të kryej akti i vrasjes së viktimës”, u shpreh ai.

Në fjalën e tij, Rrahmani përshkroi edhe rolin që, sipas aktakuzës, kanë pasur të akuzuarit. Ai tha se Rilind Murati është parë në shoqëri me Rejhan Belën gjatë kohës së kryerjes së vrasjes, ndërsa Vatan Çaka është filmuar së bashku me Muratin dhe Belën duke vëzhguar vendin e ngjarjes para se të ndodhte krimi.

Sa i përket Edmond Likës, prokurori deklaroi se ai është parë në shoqërinë e Shkëlqim Kukës duke ndjekur lëvizjet e rreshterit Muhamet Lika pas daljes nga stacioni policor. Sipas Prokurorisë, pasi viktima kaloi pranë tyre, Edmond Lika zbriti nga vetura “Opel”, pronë e Shkëlqim Kukës, dhe vazhdoi me veturën e tij “Golf 2” në drejtim të vendit ku u krye vrasja.