Real Madridi ka marrë vendimin përfundimtar për Aurélien Tchouaméni, me synimin për të financuar transferimin e Rodrit.

Real Madridi ka vendosur të shesë mesfushorin francez Aurélien Tchouaméni për të siguruar fondet e nevojshme për transferimin e yllit të Manchester Cityt, Rodri.

Rodri, i cili fitoi Kupën e Botës me Spanjën në fillim të këtij muaji, ka hyrë në 12 muajt e fundit të kontratës së tij me Manchester Cityn.

Klubi anglez dëshiron ta mbajë në “Etihad”, por 30-vjeçari thuhet se është i interesuar të rikthehet në Spanjë, pasi u largua nga Atletico Madridi për t’u transferuar në Angli në vitin 2019.

Sipas “Sky Sports News”, Real Madridi tashmë ka kontaktuar Manchester Cityn dhe është i gatshëm të paguajë mes 43 dhe 51 milionë funtesh për ta transferuar Rodrin në “Bernabéu”.

Rindërtimi i skuadrës nën drejtimin e trajnerit të ri Jose Mourinho deri tani është fokusuar te futbollistët me përvojë të nivelit më të lartë. Bernardo Silva, Marc Cucurella, Ibrahima Konaté dhe Denzel Dumfries janë transferuar tashmë te madrilenët.

Fituesi i “Topit të Artë”, kampion i Evropës dhe kampion bote, Rodri pritet të jetë afrimi më i madh i verës, së bashku me talentin 19-vjeçar të RB Leipzig, Yan Diomande, i cili vlerësohet me mbi 100 milionë funte.

Për të përfunduar këto transferime, Real Madridi duhet të shesë disa lojtarë.

Sipas “The Sun”, klubi është tashmë i gatshëm të ndahet me Tchouaménin, për të cilin Manchester Unitedi ka shfaqur interes të madh.

Manchester Unitedi është në proces rindërtimi të mesfushës nën drejtimin e trajnerit Michael Carrick dhe tashmë ka shpenzuar mbi 70 milionë funte për transferimet e Andrey Santos dhe Youri Tielemans.

Megjithatë, drejtuesit e klubit e konsiderojnë të domosdoshëm edhe një mesfushor tjetër, ndërsa Tchouaméni ka qenë një nga objektivat kryesorë gjatë gjithë merkatos verore.

“ESPN” raportoi më herët këtë muaj se 26-vjeçari kishte arritur marrëveshje për rinovimin e kontratës me Real Madridin deri në vitin 2031, por një njoftim zyrtar ende nuk është bërë.

Në vend të kësaj, “The Sun” pretendon se madrilenët janë “të gatshëm të përfitojnë financiarisht” nga shitja e francezit, pasi kanë marrë sinjale për interesim të fortë nga Manchester Unitedi.

Jose Mourinho thuhet se fillimisht kishte dëshiruar ta mbante Tchouaménin, por situata ndryshoi pasi u krijua mundësia për transferimin e Rodrit. Tashmë, tekniku portugez mund të shesë një lojtar te klubi që e drejtoi mes viteve 2016 dhe 2018.

Manchester Unitedi e ka të përballueshme financiarisht një marrëveshje për Tchouaménin, të cilin Real Madridi e bleu nga Monaco për 68 milionë funte në vitin 2022.

Përveç Andrey Santos dhe Youri Tielemans, “Djajtë e Kuq” kanë afruar edhe portierin Karl Darlow si lojtar i lirë, pas largimit të tij nga Leeds Unitedi.

Gjithashtu, klubi ka transferuar dy talente për ekipet e akademisë: sulmuesin Tynan Thompson nga Tottenham dhe portierin Kit Margetson nga Swansea.

Në anën tjetër, Manchester Unitedi ka liruar rreth 600 mijë funte në javë nga fondi i pagave, pas largimit të Casemiros dhe Jadon Sanchos.

Tyrell Malacia është larguar gjithashtu si lojtar i lirë, ndërsa Napoli ka aktivizuar klauzolën prej 38 milionë funtesh për ta blerë përfundimisht Rasmus Hojlund pas huazimit të suksesshëm.

Ndërkohë, Andre Onana është rikthyer te Trabzonspori në huazim për sezonin e dytë radhazi.