Autoritetet greke po hetojnë shkakun e vdekjes së një gruaje britanike, trupi i së cilës u gjet në një valixhe në qendër të Athinës javën e kaluar, sipas dy zyrtarëve grekë.

Policia e identifikoi trupin si atë të 38-vjeçares Elisabeth Ross, e zhdukur që nga 15 korriku, duke përdorur bazën e të dhënave të gjurmëve të gishtërinjve të Interpolit.

“Ende nuk e kemi shkakun e vdekjes; ekzaminimi pas vdekjes është duke u kryer”, tha një nga zyrtarët e policisë. “Nuk mund të themi ende nëse është vrasje apo jo.”

Trupi i Ross u gjet më 18 korrik në një ndërtesë të braktisur në lagjen Kypseli, disa kilometra nga qendra e Athinës, raporton Reuters, transmeton Klankosova.tv.

“Po hetojmë ngjarjet pas zhdukjes së saj më 15 korrik dhe kush e vendosi trupin në valixhe dhe e transferoi atë në ndërtesën e braktisur”, shtoi zyrtari. Një zyrtar i dytë konfirmoi informacionin.

Hetuesit janë habitur nga fakti se telefoni celular i Ross vazhdoi të dërgonte mesazhe për disa ditë pas vdekjes së saj.

Ross kishte fluturuar për në Greqi nga Edinburgu në fund të qershorit.

“Ne jemi në kontakt me policinë britanike dhe kemi kontaktuar anëtarët e familjes së saj”, tha zyrtari i parë.