Një traget pasagjerësh me 267 persona në bord është përmbysur të dielën pranë Qipros Veriore, pak pasi ishte nisur nga porti i Kyrenias.

Sipas autoriteteve lokale, në traget ndodheshin 259 pasagjerë dhe tetë anëtarë të ekuipazhit.

Trageti po udhëtonte drejt portit turk Taşucu, në provincën e Mersinit, kur nisi të merrte ujë rreth 7.5 kilometra larg bregut.

Ministri i Transportit i administratës së Qipros Veriore, Erhan Arıklı, deklaroi se rreth 100 persona janë evakuuar dhe nxjerrë në breg.

Pamjet nga vendi i ngjarjes tregojnë pasagjerë me jelekë shpëtimi në ujë, pranë tragetit të përmbysur. Në zonë janë angazhuar ekipe kërkim-shpëtimi dhe shërbime mjekësore.

Ende nuk ka të dhëna të konfirmuara për viktima ose persona të zhdukur. Hetimet pritet të përcaktojnë shkakun e incidentit, ndërsa operacioni i shpëtimit po vazhdon.