Fitorja 2-1 e Real Madridit ndaj Barcelonës u shoqërua me disa vendime të diskutueshme të gjyqtarit Juan Martínez Munuera, ndërsa VAR-i u vu në qendër të kritikave.

“El Clásico” nuk prodhoi vetëm emocione dhe gola, por edhe polemika të shumta për gjykimin.

Sipas “Tuttomercatoweb”, referi Juan Martínez Munuera tregoi tolerancë në minutat e para, duke mos ndëshkuar me kartonë të verdhë disa ndërhyrje të diskutueshme, përcjell “Gazeta Express”.

Ndërhyrjet që ndezën debat

Një nga episodet e para ndodhi në minutën e 10-të, kur Aurélien Tchouaméni ndërhyri ndaj Xavi Espartit.

Mesfushori francez e preku fillimisht topin, por më pas e goditi këmbën e kundërshtarit, pa u ndëshkuar me karton të verdhë.

Edhe Marc Cucurella shpëtoi nga ndëshkimi në pjesën e parë, pavarësisht ndërhyrjeve të përsëritura ndaj Lamine Yamalit.

Polemika më e madhe erdhi në minutën e 56-të, kur João Cancelo e goditi me taka në pulpë Yan Diomanden gjatë tentativës për t’ia marrë topin.

Sipas medias italiane, VAR-i nuk e kërkoi rishikimin e aksionit, ndonëse ndërhyrja mund të sillte karton të kuq.

Kritika edhe për vendimet në fund të ndeshjes

Në minutën e 84-t, Anthony Gordon u ndëshkua me karton të verdhë pas një ndërhyrjeje ndaj Arda Gülerit.

Megjithatë, lojtari e kishte fituar fillimisht topin në mënyrë të rregullt.

Një tjetër episod i diskutueshëm ndodhi në minutën e 94-t, kur Eduardo Camavinga e shkeli Rodrin pas një ndërhyrjeje me vonesë.

Edhe në këtë rast pati pretendime se VAR-i duhej ta shqyrtonte mundësinë e një ndëshkimi më të rëndë.

Kështu, fitorja e Real Madridit me rezultat 2-1 ndaj Barcelonës u shoqërua me diskutime të shumta për kriterin e referimit dhe mungesën e ndërhyrjes së VAR-it në momentet më të kontestuara. /Express