Barcelona dhe Atletico Madridi do të përballen sonte në stadiumin “Metropolitano”, në një ndeshje me rëndësi të madhe në garën për titullin e La Ligës.

Një nga temat më të diskutuara para kësaj ndeshjeje ka qenë marrëdhënia mes dy klubeve, e cila arriti në pikën më të ulët gjatë verës për shkak të interesimit të Barcelonës për transferimin e Julian Alvarez.

Megjithatë, duket se drejtuesit e Barcelonës dhe Atletico Madridit e kanë lënë pas këtë çështje dhe marrëdhëniet mes dy klubeve tashmë janë stabilizuar. Këtë e bëri të ditur Joan Laporta në prag të përballjes së sontme.

Të njëjtën gjë e ka konfirmuar edhe presidenti i Atletico Madridit, Enrique Cerezo, kur është pyetur për marrëdhëniet e klubit të tij me Barcelonën.

“Me Barcelonën, çështja e Julianit u zgjidh në atë kohë. Ne thamë atë që duhej të thoshim. Nuk kemi më arsye të flasim për Julianin”, deklaroi ai.

Cerezo shtoi se pret që Alvarez të zhvillojë një paraqitje të mirë kundër Barcelonës sonte dhe të jetë njëri prej protagonistëve kryesorë të ndeshjes.

“Atë që duhet ta dëshmosh, duhet ta dëshmosh në fushë. Jam i sigurt se ai do të jetë ylli i ndeshjes”, u shpreh Cerezo, i cili më pas e cilësoi Barcelonën si “njërën prej skuadrave më të mira në Evropë, në mos më të mirën”.

Në fakt, presidenti i Atletico Madridit deklaroi se klubi ka marrëdhënie të mira me të gjitha skuadrat në futbollin spanjoll, pavarësisht kategorisë ku garojnë.

“Marrëdhëniet janë të mira me të gjitha klubet e Primera, Segunda, Tercera Regional, si dhe kategorive të katërt dhe të pestë”, përfundoi ai.

Ndonëse drejtuesit e Atletico Madridit dhe Barcelonës duket se janë në një linjë sa i përket marrëdhënieve mes dy klubeve, e njëjta gjë nuk mund të thuhet për tifozët.

Në fakt, Barcelona pret një atmosferë armiqësore sonte në “Metropolitano”, ku futbollistët e saj mund të përballen me një pritje të ftohtë nga tifozët vendas.

Kjo lidhet kryesisht me përpjekjet e Barcelonës për ta transferuar Julian Alvarezin në Katalonjë gjatë verës. Për këtë arsye, mbetet interesante të shihet se si do ta presin tifozët vendas sulmuesin argjentinas në ndeshjen e sontme.