Përfaqësuesi i Qeverisë Amerikane për Ballkanin Perëndimor, Gabriel Escobar, me përfaqësuesin e Posaçëm të BE-së për dialogun Kosovë-Serbi, Miroslav Lajçak, pritet të nisin sot vizitë treditore në Kosovë.
Deri më tani është bërë e ditur se dy emisarët do të zbarkojnë në Kosovë me modele të reja për Asociacionin e Komunave Serbe (AKS).
Demokracia.com ekskluzivisht ka raportuar se një prej modeleve që pritet t’i prezantohet lidershipit kosovar është i ngjashëm me atë të komunitetit gjermanofolës në Belgjikë, i ashtuquajturi model i “Belgjikës Lindore”.
Ky raportim i Demokracia.com ka ngjallur reagime në rajon. Edhe analisti i njohur në Bosnje e Hercegovinë, Jasmin Mujanoviq, ka reaguar pas këtij raportimi.
“Raportimet se dy të dërguarit e SHBA-së dhe BE-së do të propozojnë modelin belg si një mënyrë për të adresuar statusin e komuniteteve kroate dhe serbe në ato vendet respektive. “Një masë për të gjithë” funksionin për këmisha, më pak te Kushtetuta”, ka shkruar Mujanoviq, që është edhe doktor i shkencave politike.
Të shtunën është raportuar në medie se një prej modeleve para të cilës do të gjendet Albin Kurti është i ngjashëm me atë të komunitetit gjermanofolës në Belgjikë, që si rajon njihet edhe si “Belgjika Lindore”.
Model i ngjashëm me atë që do t’i prezantohet së shpejti Kosovës është ky i komunitetit gjermanofolës (DG = Deutschsprachige Gemeinschaft), si një nga entitetet e federuara të Belgjikës. Gjuha gjermane përdoret në shërbimin civil, në shkolla dhe në gjykata. DG shtrihet në pjesën lindore të Belgjikës, duke mbuluar një sipërfaqe prej 854 kilometra katrorë përgjatë kufijve të vendit me Gjermaninë, Holandën dhe Luksemburgun.
Rreth 77,000 njerëz jetojnë në nëntë komunat e DG-së, në kryqëzimin e dy kulturave, gjermane dhe latine.
Ky model kompetencat politike në masë të madhe i zhvendosë në sektorë të tjerë, siç janë sistemi arsimor, sistemi i drejtësisë, siguria, etj. Megjithatë, modeli belg ka edhe kompetenca politike, ku krejt së bashku i bëjnë të domosdoshme edhe ndryshimet kushtetuese, pasi që si rajon ka fuqi legjislative dhe e ruan një autonomi të gjerë me një parlament, një qeveri dhe një shërbim civil.
Drejtoria e Përgjithshme atje është përgjegjëse kryesisht për çështjet kulturore, arsimin, formimin profesional, punësimin, familjen dhe mirëqenien sociale, si dhe mbikëqyrë autoritetet lokale.
Po ashtu, Kushtetuta e Belgjikës përfshin krijimin e zonave gjuhësore, te cilat kanë kompetenca në shumë fusha.
Neni 4 i Kushtetutës së Belgjikës thotë: “Belgjika përbëhet nga katër zona gjuhësore: zona e gjuhës gjermane, zona e gjuhës frënge, zona e gjuhës holandeze dhe zona dygjuhëshe Bruksel – Kryeqytet”.
Sa i përket Asociacionit të Komunave Serbe, ashtu siç është prezantuar deri më tani në Kosovë, çështja kryesore në lidhje me themelimin e tij është ajo e kompetencave.
Në dhjetor të vitit 2015, Gjykata Kushtetuese e Kosovës konstatoi se këto parime për asociacionin nuk ishin plotësisht në harmoni me frymën e Kushtetutës të përmendur në nenin 3, për “barazinë para ligjit” dhe kapitujt “të drejtat dhe liritë themelore”, si dhe “të drejtat e komuniteteve dhe pjesëtarëve të tyre”.
Me këtë vendim të Gjykatës Kushtetuese ishte përcaktuar se Asociacioni i Komunave Serbe duhej të themelohej ashtu siç e parasheh Marrëveshja e Parë e Brukselit, e ratifikuar nga Kuvendi i Kosovës.
Vlen të përmendet se Qeveria e Kosovës e drejtuar nga Albin Kurti është shprehur vazhdimisht kundër krijimit të Asociacionit të Komunave Serbe, të cilin gjithmonë e quanin Zajednicë.
Vetë kryeministri Kurti disa herë është shprehur se nuk do ta zbatojë këtë kërkesë të BE-së, i cili nga blloku evropian vazhdimisht ka marrë reagime se një gjë e tillë duhet të ndodhë në kuadër të dialogut Kosovë-Serbi, në mënyrë që të shkohet drejt një marrëveshje finale, që përfundon me njohje reciproke mes dy vendeve.
Video
VideoVideo
Video
Video
