Zyrtarë të lartë të Aleancës për Ardhmërinë e Kosovës (AAK) kanë bërë të martën homazhe pranë shtatores së heroit, Zahir Pajaziti në kujtim dhe nderim të 26-vjetorit të rënies së tij dhe bashkëluftëtarëve të tij, Hakif Zejnullahu dhe Edmond Hoxha.

Ish-komandanti i UÇK-së, Lahi Brahimaj pas homazheve ka rrëfyer ngjarje të rëndësishme nga lufta duke e cilësuar Zahirin si njeri i veprimit dhe aksionit.

“26 vjet më parë u përjetësuan Zahir Pajaziti, Edmond Hoxha dhe Hakif Zejnullahu. Me Zahirin kishim takime të rregullta, si dy anëtar të Shtabit të Përgjithshëm të UÇK-së. Herën e fundit e takova një javë para rënies”, thuhet në njoftimin e AAK-së.

“Zahiri ishte njeri i veprimit dhe aksionit. Ashtu i edukonte edhe bashkëluftëtarët e tij, për më pak fjalë e më shumë veprime në favor të arritjes së lirisë. Ashtu edhe ra. Heroikisht në luftë me armikun deri në plumbin dhe frymën e fundit”, thuhet tutje.

Ndryshe, më 31 dhjetor të vitit 1997, ka ndodhur një ndër betejat e para të mëdha të pjesëtarëve të Ushtrisë Çlirimtare të Kosovës (UÇK).

Gjatë asaj dite, Zahir Pajaziti, Hakif Zejnullahu dhe Edmond Hoxha po udhëtonin nga Prishtina në drejtim të Vushtrrisë, gjersa grupi i tyre ishte zbuluar nga sigurimi serb, të cilët njëherazi kishin vënë pritë në fshatin Pestovë, ku të tre bien heroikisht në luftë me ta.