Udhëheqësi i opozitës ruse i burgosur, Alexei Navalny, është vlerësuar me Çmimin Sakharov për Lirinë e Mendimit, njëherit edhe çmimi më i lartë i Bashkimit Evropian për mbrojtësit e të drejtave të njeriut.

Çmimi u zgjodh nga drejtuesit e partive politike të përfaqësuara në Parlamentin Evropian gjatë një sesioni plenar në Strasburg këtë të mërkurë, shkruan Euronews, transmeton Klankosova.tv.

Navalny, u nominua përkrah grave afgane, gjendja e të cilëve ka zënë qendër pas kontrollit të talibanëve dhe Jeanine Áñez, një politikane boliviane e cila u bë presidente e përkohshme në vitin 2019 pas mashtrimit elektoral të pretenduar nga Evo Morales. Áñez u arrestua më vonë për pretendimin e komplotit të grushtit të shtetit kundër Morales.

Çmimi Sakharov u krijua në 1988 për të nderuar individët dhe organizatat që mbrojnë të drejtat e njeriut dhe liritë themelore. Çmimi vjetor është emëruar në nder të fizikantit dhe disidentit politik Sovjetik Andrei Sakharov, një avokat i lirive civile në ish-Bashkimin Sovjetik.

Teksa personat e parë që morën këtë çmim ishin Nelson Mandela dhe Anatoli Marchenko.

Çmimi prej 50,000 eurosh supozohet të jepet gjatë një sesioni të Parlamentit Evropian në Strasburg më 15 dhjetor, edhe pse kjo duket se nuk ka gjasa të ndodhë në rastin e Navalny pasi ai aktualisht po vuan një dënim dy vjet e gjysmë burg për mashtrim në Rusi.

“Çmimi i sotëm njeh trimërinë e tij të jashtëzakonshme dhe ne përsërisim thirrjen tonë për lirimin e tij të menjëhershëm,” tha David Sassoli, President i Parlamentit Evropian.