Arsenali ka marrë një përditësim të madh sa i përket të ardhmes së Julian Alvarez, teksa “Topçinjtë” mirëpresin Bruno Guimaraes në skuadrën që fitoi titullin e Premierligës.

Skuadra e Mikel Artetës fitoi kampionatin anglez për herë të parë pas tentativës së katërt në sezonin 2025-26, pasi në tri sezonet paraprake kishte përfunduar në vendin e dytë, pas Liverpoolit dhe Manchester Cityt.

“Topçinjtë” po shijojnë një merkato fitimprurëse, pasi kanë afruar liderin e Newcastle, Guimaraes, në prag të asaj që mund të jetë mbrojtja e parë e titullit në historinë e klubit.

Arsenali dukej se ishte pranë transferimit të superyllit të Real Madridit, Vinicius Junior, në një lëvizje të befasishme, megjithatë gjigantët spanjollë arritën ta bindnin lojtarin të qëndronte.

Tani, skuadra e Artetës ka marrë një përditësim mbi situatën e Julian Alvarez të Atletico Madridit, me klubin londinez që është lidhur me argjentinasin që pak pas përballjes mes dy skuadrave në Ligën e Kampionëve sezonin e kaluar.

“Topçinjtë” arritën deri në finalen e kompeticionit, ku pas 120 minutash rezultati ishte 1-1, përpara se të humbnin me penallti ndaj PSG-së, dy herë fituese të trofeut.

Kampionët e Premierligës eliminuan klubin e Alvarez me rezultatin e përgjithshëm 2-1 në gjysmëfinalet e Championsit, me sulmuesin e Atletico Madridit që shënoi golin e vetëm të skuadrës së tij në të dyja ndeshjet.

Tani, Diego Simeone ka zbuluar detaje të rëndësishme në lidhje me të ardhmen e Alvarez para sezonit 2026-27, ndërsa Arsenali ka nevojë të madhe për përforcime në sulm, në përpjekje për të fituar për herë të dytë radhazi titullin e kampionit.

“Klubi ka marrë një vendim, të cilin Miguel Angel Gil Marin e ka shpjeguar shumë mirë”, deklaroi Simeone për gazetarët përpara ndeshjes miqësore të skuadrës së tij kundër Manchester Cityt.

“Sa i përket aspektit sportiv, ne jemi shumë të lumtur që kemi një lojtar si Julian dhe do të vazhdojmë ta ndihmojmë atë të rritet dhe të përmirësohet”, shtoi trajneri i Atletico Madridit.

Gil Marin, CEO i Atletico Madridit që nga viti 2002, kishte komentuar interesimin e Barcelonës në fund të qershorit dhe nuk i kishte kursyer kritikat e ashpra ndaj gjigantëve të La Ligës për përpjekjet e tyre për të transferuar lojtarin.

“Barça po tregohet mosrespektuese ndaj nesh. Ata mendojnë se mund të bëjnë me ne çfarë të duan”, kishte thënë Gil Marin.

“Ata mendojnë se ne jemi të dobët dhe budallenj. Por në të vërtetë, ata thjesht po i tregojnë botës një mënyrë veprimi që i përkufizon shumë mirë”, shtoi ai.

Për momentin, duket se Alvarez do të qëndrojë te Atletico Madrid.

Sezonin e kaluar, ai u bë lojtari i parë në historinë e Atletico Madridit që shënonte shifra dyshifrore në Champions, duke udhëhequr skuadrën e tij deri në gjysmëfinale të turneut.

Argjentinasi pati një Botëror nën standardet e tij, por gjithsesi shënoi një gol vendimtar në çerekfinale ndaj Zvicrës, e cila luante me 10 lojtarë, në kohën shtesë, duke e ndihmuar kombëtaren e tij të kalonte përballë Anglisë. Alvarez realizoi një goditje spektakolare nga këndi i zonës.

Ardhja e Guimaraes dhe cilësitë e tij si lider mund të jenë vendimtare në përpjekjen e Arsenalit për të mbrojtur titullin, diçka që klubi nuk ka arritur ta bëjë kurrë në historinë e tij.

Megjithatë, përpjekjet për të transferuar Alvarez dhe Vinicius Junior mund të tregojnë se brenda klubit ekziston frika se thellësia e repartit ofensiv nuk është e mjaftueshme, pavarësisht ardhjes së Viktor Gyokeres, i cili e mbylli sezonin 2025-26 si golashënuesi më i mirë i “Topçinjve”, pasi iu bashkua klubit verën e kaluar.