Pas gati 30 vjetësh në pushtet, presidenti i Sudanit Omar al-Bashir, është rrëzuar nga pushteti dhe është arrestuar, ka bërë të ditur gjenerali dhe Ministri i Mbrojtes në këtë vend, shkruan Al Jazeera, transmeton Klan Kosova.
Ahmed Awad Ibn Auf gjithashtu tha se Omar al-Bashir është arrestuar dhe është dërguar në një vend të sigurt, ndërsa kontrollin e vendin e ka marrë një këshill i përkohshëm ushtarak.
Ai deklaroi gjendje të jashtëzakonshme tre mujore dhe tha se këshilli ushtarak do të qeverisë për dy vjet.
Ai tha se hapësira ajrore është e mbyllur për 24 orë.
Dhjetëra mijëra sudanezë marshuan të hënën herët në qendrën e kryeqytetit Khartoumi duke vallëzuar dhe kënduar me slogane anti-Bashir.
Protestuesit jashtë ministrisë së mbrojtjes thërrisnin “Ka rënë, kemi fituar”.
Protestat, të cilat shpërthyen në dhjetor, u shndërruan në sfidën më të madhe për tre dekadat e sundimit të Bashirit.