Ministria e Arsimit, Shkencës dhe Teknologjisë, tregon se pas shqetësimeve që ka pranuar nga mësimdhënësit dhe Drejtoritë Komunale të Arsimit, në lidhje me Udhëzimin Administrativ e vjetër numër 06/2015, ku në bazë të Nenit 11, thuhej se pas përfundimit të vitit shkollor 2017/18, shpallen konkurset për të gjithë mësimdhënësit që janë të punësuar në arsimin e mesëm të ulët dhe arsimin e mesëm të lartë, të cilët nuk i plotësojnë kriteret sipas këtij Udhëzimi Administrativ.

“Me qëllim të zgjidhjes së këtij problemi, që deri këtu ka ardhur jo për fajin e kandidatëve që duhej të kualifikoheshin dhe avancoheshin, por për fajin që kjo reformë ka ngecur në proces, Ministri i Arsimit, Shkencës dhe Teknologjisë, Shyqiri Bytyqi, përmes grupit të punës ka kërkuar të rishikohet Udhëzimi Administrativ në fjalë, dhe pas rishikimit ka nënshkruar Udhëzimin Administrativ për normativin mbi kuadrin profesional të arsimit të përgjithshëm”, tregohet në komunikatë.

Tani në bazë të Udhëzimit Administrativ të ri institucionet edukative dhe arsimore gjatë publikimit të konkurseve për vendet e lira të punës janë të obliguara të kërkojnë kuadro sipas këtij udhëzimi.

Në komunikatë tregohet se ky udhëzim rregullon edhe shpalljen e vendeve të lira të punës si: mësimdhënësit të cilët janë në marrëdhënie pune në institucionet e arsimit parauniversitar me gradë kualifikimi baçelor trevjeçar me 180 ECTS që kanë më shumë se 6 vjet përvojë pune në arsim dhe që kanë licencë të mësimdhënësit, e vazhdojnë punën në profesionin e tyre deri në përfundimin e vitit shkollor 2020-2021, pas përfundimit të vitit shkollor 2020/21, shpallen konkurset për të gjithë mësimdhënësit që janë të punësuar në arsimin e mesëm të ulët dhe arsimin e mesëm të lartë, të cilët nuk i plotësojnë kriteret sipas këtij Udhëzimi Administrativ, të gjithë të kualifikuarit në njësitë akademike që kanë përfunduar master arsimor me 300 ECTS, kanë të drejtë konkurrimi në arsimin parauniversitar të paraparë në nenin 5 dhe 6 të këtij UA, pedagogët që janë me 180 ECTS në marrëdhënie pune si edukatorë dhe mësues klase, e vazhdojnë punën deri në përfundim të vitit shkollor 2020/21, me qëllim që brenda kësaj periudhe të përfundojnë programin e avancimit.

Me hyrjen në fuqi të këtij Udhëzimi Administrativ, është shfuqizuar normativi mbi kuadrin profesional të arsimit të përgjithshëm, njoftohet në komunikatë.

MAShT përmes komunikatës kërkon nga Drejtoritë Komunale të Arsimit, që shpalljen e vendeve të lira të punës ta bëj në harmoni të plotë me udhëzimin administrativ të ri Nr. 10/2018, të datës 20 korrik 2018.