Prishtinë – Çmimet e prodhimit në Kosovë u rritën mesatarisht me 4.6 për qind në tremujorin e dytë të vitit 2026, krahasuar me të njëjtën periudhë të vitit 2025, sipas të dhënave për Indeksin e Çmimeve të Prodhimit (IÇP).

Rritja më e madhe u regjistrua në grumbullimin, trajtimin dhe furnizimin me ujë, me 32.2 për qind. Pas saj renditen prodhimi i pijeve me 20.1 për qind dhe prodhimi i letrës dhe produkteve prej letre me 14.7 për qind.

Rritje të çmimeve u shënuan edhe në prodhimin tjetër me 9.8 për qind, prodhimin e produkteve të gomës dhe plastikës me 3.8 për qind, produktet minerale jo metalike me 3.3 për qind dhe përpunimin e produkteve ushqimore me 3.2 për qind.

Ndërkohë, çmimet ranë në disa degë të industrisë. Ulja më e theksuar ishte te prodhimi i veshjeve, me 6.4 për qind, pasuar nga prodhimi i lëkurës dhe produkteve prej lëkure, me 2.8 për qind.

Rënie u regjistruan gjithashtu te prodhimi i produkteve të fabrikuara metalike, me 1.6 për qind, si dhe te aktivitetet e grumbullimit, trajtimit dhe asgjësimit të mbeturinave dhe rikuperimit të materialeve, me 1.0 për qind.

Në përgjithësi, të dhënat tregojnë se rritja e çmimeve në disa sektorë kryesorë të ekonomisë ka ndikuar në rritjen mesatare prej 4.6 për qind të çmimeve të prodhimit në Kosovë gjatë TM2 2026.