Danimarka thotë se do të huazojë 55,000 doza të vaksinës AstraZeneca COVID-19 në Gjermaninë fqinje.

Ministria e Jashtme daneze konfirmoi në një deklaratë se vaksinat e padëshiruara do t’i dhurohen shtetit kufitar gjerman të Schleswig-Holstein, shkruan Euronews, përcjell Telegrafi.

“Pas një kërkese nga kryeministri i Schleswig-Holstein, qeveria ka vendosur të ofrojë 55,000 doza të vaksinës AstraZeneca të disponueshme në rajonin kufitar”, ka thënë ministria.

“Dozat e vaksinës do të kthehen pas një afati kohor për të cilin është rënë dakord”, shtoi deklarata.

Ndryshe, Danimarka ishte vendi i parë evropian që njoftoi se po “braktiste” vaksinën e AstraZeneca (Vaxzevria) për shqetësimet e efekteve anësore “të rralla” por “serioze”.

Instituti i Shëndetit Publik të Norvegjisë gjithashtu rekomandoi kundër përdorimit të mëtejshëm të kësaj vaksine, pavarësisht rekomandimeve nga Agjencia Evropiane e Barnave dhe Organizata Botërore e Shëndetësisë (OBSH).

Sidoqoftë, Autoriteti shëndetësor i Danimarkës ka vazhduar shpërndarjen e vaksinave duke përdorur të tjera të zhvilluara nga Pfizer/BioNTech dhe Moderna.

Por Danimarka ka treguar se mund të rikthejë vaksinën AstraZeneca në një datë të mëvonshme “nëse situata ndryshon”. Vendi ka një rezervë të vlerësuar prej 200,000 doza të Vaxzevria.

Një numër vendesh evropiane – përfshirë Letoninë, Lituaninë dhe Republikën Çeke – kishin shprehur interes për të blerë vaksina të AstraZeneca nga Danimarka.

Drejtori i OBSH-së për Evropën, Hans Kluge, tha javën e kaluar se autoritetet daneze po konsiderojnë ndarjen e dozave të papërdorura me vendet e varfra.