Vlera e parave të dërguara nga diaspora ishte 329.6 milionë euro, që paraqet një rënie vjetore prej 2.7 për qind. Në periudhën e njëjtë të vitit të kaluar, remitencat e pranuara në Kosovë, ishin 338.9 milionë euro

Paratë që dërgojnë bashkatdhetarët që punojnë jashtë, vazhdojnë të mbeten një “ventil” i rëndësishëm për gjendjen sociale në Kosovë. Por, këto dërgesa variojnë në njërën anë dhe është vështirë të kemi pasqyrën e plotë të lëvizjes së tyre, nga ana tjetër. Kjo e fundit, për shkakun se pjesën më të madhe të parave mërgimtarët e dërgojnë përmes rrugëve informale dhe më pak përmes bankave apo agjencive të specializuara.

Sidoqoftë, remitencat e pranuara në Kosovë, sipas të dhënave të fundit të Bankës Qendrore të Kosovës të cilat flasin për gjashtë muajt e parë të këtij viti, kanë shënuar rënie krahasuar me periudhën e njëjtë të vitit të kaluar, shkruan Radio Evropa e Lirë. Vlera e parave të dërguara nga qytetarët e Kosovës të cilët jetojnë dhe punojnë në vende të ndryshme të botës, sipas këtyre të dhënave ishte 329.6 milionë euro, që paraqet një rënie vjetore prej 2.7 për qind. Në periudhën e njëjtë të vitit të kaluar, remitencat e pranuara në Kosovë, ishin 338.9 milionë euro.

Rënien e nivelit të remitencave, kryetari i Odës Ekonomike të Kosovës, Safet Gërxhaliu e quan shqetësuese, për faktin siç thotë ai, “këto para janë një burim i rëndësishëm i financimit të konsumit në Kosovë”. “Është një indikator që neve si Odë Ekonomike na ka shqetësuar, na ka shqetësuar nga vet fakti se ka qenë njëra ndër shtyllat kryesore që Kosova të arrijë një stabilitet social dhe një qëndrueshmëri. Kjo rënie e remtiencave fillimisht ka të bëjë me faktin se ne si shtet nuk kemi treguar gatishmëri që t’i motivojmë edhe diasporën për të ndihmuar më tepër. E dyta është si pasojë e krizës financiare dhe globale ekonomike, e cila ka koston e vet”, thekson Gërxhaliu.

Në Ministrinë e Diasporës, rënien vjetore prej 2.7 për qind të remitencave nuk e konsiderojnë të lartë, megjithatë ata besojnë që janë disa faktorë që kanë ndikuar në këtë rënie.

Këshilltari i lartë politik në Ministrinë e Diasporës, Kushtrim Sheremeti, thotë se rënia e remitencave mund të ndërlidhet edhe me gjendjen jo stabile politike në të cilën ka kaluar Kosova gjatë periudhës së fundit