Diplomatët kinezë në Shtetet e Bashkuara do të duhet t’i njoftojnë autoritetet amerikane para se të takojnë zyrtarë të Shteteve të Bashkuara.

Vizitat zyrtare në “institucione të edukimit dhe ato kërkimore” sikurse shkollat dhe universitetet duhet po ashtu të jenë të regjistruara, ka thënë Departamenti amerikan i Shtetit.

Kina ka thënë se SHBA-ja është duke thyer rregullat ndërkombëtare, mirëpo autoritetet amerikane kanë thënë se diplomatët e tyre përballen me kufizime të njëjta në Kinë.

Sipas masës së re, diplomatët kinezë nuk duhet të kërkojnë leje për takime, mirëpo u kërkohet të njoftojnë paraprakisht për zhvillimin e tyre.

Ndërkohë Ambasada Kineze në SHBA, i ka cilësuar këto rregulla “në kundërshtim me Konventën e Vjenës”.

“Kina nuk ka kërkesa të ngjashme për diplomatët amerikanë dhe zyrat e konsullatës në Kinë”, është thënë në deklaratë.

“Sa i përket reciprocitetit, SHBA-ja ka numër shumë më të madh të personelit diplomatik në Kinë, sesa që ka Kina në SHBA”.

Përndryshe, Konventa e Vjenës është një marrëveshje që përcakton rregullat e marrëdhënieve diplomatike.

Sipas saj, diplomatëve “u garantohet” liria e lëvizjes dhe udhëtimit në vendin nikoqir.

Kjo masë e re e SHBA-së është vënë në kohën e rritjes së tensioneve në mes të të dyja shteteve.

Si SHBA-ja, ashtu edhe Kina kanë vënë tarifa në mallrat e njëra-tjetrës në vlerë të miliarda dollarëve në vitin e kaluar.

Megjithatë, Departamenti amerikan i Shtetit ka thënë se rregullat e reja nuk lidhen “drejtpërdrejt” me luftën tregtare me Kinën.

Presidenti amerikan, Donald Trump pati përmendur “praktikat e padrejta tregtare” të Kinës, kur ka vendosur që t’iu vë tarifa mallrave të këtij shteti.