Tefik Sylejmani dhe Ekrem Salihu do të përgjigjen para Gjykatës Themelore në Prishtinë për atë që kishin vendosur t’i rrezonin procedurat e prokurimit për tenderin 8-milionësh për ushqimin e FSK-së, pavarësisht se të gjitha faktet ishin në favorin e operatorit ekonomik që këta e eliminuan.
Kohavisioni ka provuar të marrë një konfirmim zyrtar nga Prokuroria për këtë çështje, por pa rezultat.
Ndërkohë, burime të KTV-së brenda Prokurorisë së Shtetit, bëjnë të ditur se aktakuza tashmë është ngritur, por që prokurori i rastit ndodhet në pushim vjetor.
Gjykata e Tenderëve ka bërë të ditur se ende zyrtarisht nuk janë njoftuar nga prokuroria për ngritjen e një aktakuze të tillë.
Sidoqoftë, ata kanë bërë të ditur se konform ligjit të prokurimit publik, gjykata kompetente në ditën e ngritjes së aktakuzës ndaj kryetarit apo ndonjë anëtari të OShP-së, e dërgon njoftimin te kryetari i Kuvendit, i cili në emër të Kuvendit si institucion që e ka emëruar, e njofton OShP-në për suspendimin e kryetarit apo anëtarit të tij.
KTV-ja ka kërkuar përgjigje edhe nga Gjykata Themelore në Prishtinë nëse ka marrë një iniciativë të tillë, por as ky institucion nuk është përgjigjur.
Kohavisioni kishte raportuar edhe më parë për historinë e këtij tenderi, ku si rrjedhojë e rrëzimit të tij, Forca e Sigurisë së Kosovës ishte e obliguar që për gati një vit t’i vazhdojë procedurat e ringocimit për ushqim me “Beni Donën”.
Historia nisi kur Organi Shqyrtues vendosi të hedhë poshtë vendimin e Autoritetit Kontraktues të MFSK-së, për të lidhur kontratë me “Beni Dona Plast”, e cila ishte kompania e dytë për nga çmimi më i ulët, por që ishte vlerësuar e përgjegjshme.
Ky fakt ka shtyrë operatorin tjetër që të ushtrojë ankesë në Gjykatën e Tenderëve.
Operatori Ekonomik “Florenti dhe Korabi” kishte ofertë më të lirë për 800 mijë euro. Por, ky operator u konsiderua si i papërgjegjshëm, sepse nuk ofroi dëshmi me dokumente se ka bërë shërbime të tilla më parë dhe do të mund t’i furnizonte të gjitha kazermat me ushqim.
Eksperti shqyrtues i OShP-së, pasi kishte analizuar faktet, i kishte dhënë të drejtë FSK-së që të lidhë kontratë me operatorin “Beni Dona”.
Por, Bordi i OShP-së më 24 dhjetor të 2015-s dha vendim që të anulohet aktiviteti i prokurimit, sepse ishte shkelur ligji i prokurimit.