Pas fillimit rishtazi të rastit të njohur si “Stenta 2”, mbrojtja ka deklaruar në seancën e së martës se aktakuza nuk i përmban elementet qenësore të nevojshme për kualifikimin juridik.

Ky rast ka filluar rishtazi për shkak të ndryshimit të trupit gjykues dhe kalimit më shumë se tre muaj nga seanca e fundit, raporton “Betimi për Drejtësi”.

Pasi që aktakuza është konstatuar e lexuar dhe seanca vazhdoi me fjalën hyrëse.

Andaj në fjalën hyrëse të dhënë nga mbrojtësi i të akuzuarit Lulëzim Kamberi, avokati Blerim Xharavina, i njëjti tha se e kundërshton aktakuzën ndaj të mbrojturit të tij.

“E kundërshtoj në tërësi aktakuzën në raport me të mbrojturin tim lidhur me kualifikimin ligjor të saj”, tha avokati Xharavina.

Sipas tij, kjo për faktin se nuk ka prova të mjaftueshme që e mbështesin dyshimin e bazuar se i akuzuari Kamberi ka kryer veprat penale që i vihen në barrë.

Avokati Xharavina, tha se në lidhje me veprën e supozuar penale keqpërdorim i detyrës zyrtare, i mbrojturi i tij asnjëherë nuk ka rekomanduar pacient jashtë institucioneve shëndetësore, përveç rasteve emergjente të cilat parashihen në ligjin e shëndetësisë dhe udhëzimit administrativ, si dhe marrëveshjes mes Ministrisë të Shëndetësisë dhe spitaleve private.

Ndërsa, në lidhje me veprën penale të marrjes së ryshfetit, i njëjti tha se i mbrojturi i tij ka punuar në spitalin “International Medicine Hospital” nga viti 2010 deri në vitin 2014, duke theksuar se ka qenë i punësuar me kontratë të rregullt.

Kështu, avokati Xharavina propozoi gjykatës që aktakuza të refuzohet.

Ndërsa, paraprakisht gjatë fjalës hyrëse mbrojtësi i të akuzuarit Gani Bajraktari, avokati Reshat Millaku, ka thënë se vepra penale për marrjen e ryshfetit ka arritur disa herë parashkrimin.

Gjithashtu, edhe mbrojtësi i të akuzuarit Kelmend Pallaska, avokati Ramë Dreshaj ka thënë se duhet të aplikohet Kodi Penal i cili është më i favorshëm për të mbrojturin e tij sa i përket parashkrimit të çështjes penale.

I njëjti shtoi se në aktakuzë nuk përmendet as shuma e të hollave të cilat pretendohet se i mbrojturi i tij i ka marrë, duke theksuar se nuk plotësohet as minimumi që të kualifikohen si vepra penale, veprat të cilat iu vihet në barrë.

Ndërkaq, çështja për parashkrim dhe kërkesa për refuzim të aktakuzës është përkrahur nga avokatë tjerë.

Ndryshe, të gjithë të akuzuarit dhe avokatët e pranishëm në këtë seancë kanë qëndruar pranë fjalës hyrëse të dhënë në seancat e kaluara.

Tutje, pas përfundimit të fjalës hyrëse, seanca ka vazhduar me dëgjimin e dëshmitarëve të dëmtuar, Abaz Osmani, Shefket Abdullahu, Adem Ukaj, Nexhat Dragaj dhe Bedri Haxhijaj.

Të gjithë dëshmitarët deklaruan se qëndrojnë prapa deklaratave të tyre të dhëna në seancat e mëparshme.

Kurse, dëshmitarët Adem Ukaj, Nexhat Dragaj dhe Bedri Haxhijaj, ndër të tjera deklaruan se nuk janë të dëmtuar.

Ndryshe, në rastin “Stenta 2” kanë qenë të përfshirë 45 mjekë, por për shkaqe shëndetësore, gjatë seancave të kaluara ishte veçuar procedura për të akuzuarit Elfedin Muhaxheri, Ferid Susuri, Ferihane Sefa, Masar Gashi, Murat Abazi dhe Nexhmi Zeqiri.

Kurse, për të akuzuarin S.Gj. ka pushuar procedura penale, pasi i njëjti ka ndërruar jetë.

Me akuzat e PSRK-së në këtë rast, tashmë janë duke u përballur 38 të akuzuar, përkatësisht, Gani Bajraktari, Daut Gorani, Elfedin Muhaxheri, Reshat Emra, Hamza Selmani, Ismajl Avdimetaj, Sali Shala, Nehat Rexhepaj, Agron Besimi, Petrit Ademaj, Bajram Mziu, Agron Leka, Driton Miftari, Besim Guda, Mirdi Strana, Shemsedin Shabollari, Fisnik Hima, Luan Pazhari, Galina Berisha, Bajram Preteni, Lulzim Kamberi, Faik Shatri, Ejup Pllana, Florim Sadiku, Halim Halili, Agim Krasniqi, Hajdin Çitaku, Edmond Haliti, Besnik Koliqi, Afrim Poniku, Banush Gashi, Nebih Musliu, Dardan Koqinaj, Xhevdet Krasniqi, Lazër Prekpalaj, Rexhep Manaj, Kelmend Pallaska dhe Arlind Batalli.

Në këtë rast, të përfshirë kishin qenë edhe ish-ministri i Shëndetësisë (MSH), Ferid Agani, ish-sekretari i MSH-së, Gani Shabani dhe 11 të akuzuar të tjerë, mirëpo, rasti ishte veçuar në tri pjesë në shqyrtimin fillestar.

Të akuzuarit në rastin “Stenta 2”, ngarkohen nga PSRK-ja me veprat penale të keqpërdorimit të pozitës apo autoritetit zyrtar dhe marrje ryshfeti.

Sipas aktakuzës së PSKR-së, ekziston dyshimi i bazuar mirë se nga 1 janari 2011 e deri më 31 dhjetor 2015, duke vepruar në bashkëkryerje nga pozita e mjekëve në SHSKUK, kanë keqpërdorur pozitat dhe autoritetin e tyre zyrtar, në atë mënyrë që duke i tejkaluar kompetencat e tyre si anëtarë të komisioneve konziliare të Klinikës së Kardiologjisë, me dashje dhe dijeni ua kanë lëshuar letrat referuese për trajtim jashtë institucioneve publike shëndetësore së paku 233 persona edhe pse të njëjtit i kishin kryer trajtimet mjekësore.

Sipas aktakuzës, një gjë e tillë ishte bërë që personave në fjalë t’ua mundësonin kompensimin e shpenzimeve nga Ministria e Shëndetësisë për trajtim mjekësor në institucione private edhe pse, siç thotë aktakuza, në bazë të nenit 53 të Ligjit mbi Shëndetësinë, Nr.2004/04, të 19 shkurtit 2014 dhe neneve 16 dhe 25 të Ligjit për Shëndetësinë Nr.04/L-125 të 13 dhjetorit 2012, letrat referuese duhej t’u lëshohej pacientëve në momentin kur konstatohej se pacientët nuk kishin mundësi të trajtoheshin brenda sistemit publik shëndetësor.

Me këto veprime të të akuzuarve, PSKR pretendon se dëmi që i është shkaktuar buxhetit të Kosovës është 4,555,553.00 euro.

Po ashtu, aktakuza i ngarkon mjekët në rastin “Stenta 2” se kanë keqpërdorur pozitën zyrtare dhe kanë marrë ryshfet, ashtu që, në vend se pacientët që kanë shkuar për kontroll në institucione publike shëndetësore, t’i referonin në njësinë kompetente invazive në Klinikën Kardiologjike në SHSKUK në Prishtinë, të njëjtit pacientët i kanë referuar në spitale private dhe për këto veprimet kanë marrë ryshfet.

Sipas aktakuzës, për çdo pacientë që e dërgonin për vendosjen e stentave, merrnin nga 500 euro ryshfet, ndërsa për koronarografi merrnin nga 150 euro ryshfet.

Këto veprimet të tyre, sipas PSRK-së, të akuzuarit i kishin kryer në bashkëpunim me të akuzuarit që tashmë janë të përfshirë në rastin “Stenta 3”, ku janë kryesisht pronar e mjekë të spitaleve private.

Prokuroria e Shtetit, më 15 qershor 2016 kishte ngritur aktakuzë kundër ish-ministrit të Shëndetësisë, Ferid Agani, ish-sekretarit të përgjithshëm të MSh Gani Shabani dhe 62 personave të tjerë, për veprat penale “keqpërdorimi i pozitës apo autoritetit zyrtar”, “marrje e ryshfetit”, “dhënie e ryshfetit”, “trajtimi i pandërgjegjshëm mjekësor”, “ushtrimi i kundërligjshëm i veprimtarisë mjekësore dhe farmaceutike” dhe “shmangia nga tatimi “.

Në ndërkohë, prokuroria kishte hequr dorë nga ndjekja penale ndaj kardiologut Afrim Bekteshi, me arsyetimin se i njëjti është përfshirë gabimisht në aktakuzë.

Në ketë çështje penale, hetimet fillimisht janë zhvilluar kundër 116 personave fizik dhe 4 personave juridik. Mirëpo, për 56 persona fizik nuk janë plotësuar kushtet ligjore që të përfshihen në këtë aktakuzë, andaj për të njëjtit janë pushuar hetimet.

Mbrojtja e të akuzuarve ka ngritur dilema të shumta rreth ligjshmërisë së kësaj aktakuze, e cila sipas tyre, përveçse përmban prova të papranueshme ajo është ngritur në mënyrë të kundërligjshme nga prokurori i Zyrës së Kryeprokurorit të Shtetit, Besim Kelmendi. Sipas mbrojtjes, Zyra e Kryeprokurorit të Shtetit nuk ka kompetenca në ngritjen e aktakuzave siç ka ndodhur në këtë rast.