Miliona armë të lehta që qarkullojnë në Ballkan “përfaqësojnë një kërcënim madhor për sigurinë europiane”, deklaroi ministri i Jashtëm francez, Jean-Yves Le Drian, i cili sqaroi se për këtë arsye, Parisi dhe Berlini kanë vendosur të bashkojnë forcat kundër trafikut të armëve në rajon.

“Këto armë janë një kërcënim për sigurinë europiane. Situata është e papranueshme. Europoli vlerëson se janë rreth 3 deri në 6 milionë armë zjarri, që qarkullojnë aktualisht në Ballkanin Perëndimor. Kjo është një shifër gjigante”, tha Jean-Yves Le Drian, ministër i Jashtëm.

Këto armë, sipas tij përdoren gjerësisht prej rrjeteve kriminale e atyre terroriste. Nismën e përshëndeti edhe shefi i diplomacisë gjermane, Heiko Maas.

“Është një nismë e mirë, të cilën Franca dhe Gjermania po e ndërmarrin së bashku, sepse lidhet me sigurinë tonë dhe sigurinë e Europës. Është koha që të përballemi realisht me çështjen e sigurisë publike në Europë”, tha Heiko Mass, ministër i Jashtëm i Gjermanisë.

Dy ministrat u takuan në kuadrin e një nisme franko-gjermane për koordinimin e luftës kundër trafikimit të armëve në Ballkanin Perëndimor, të nisur në vitin 2017 e me disa objektiva të përcaktuar deri në vitin 2024.

Franca është angazhuar të kontribuojë finaciarisht për pajisjet dhe logjistikën e identifikimit të armëve në fjalë, e do të krijojë gjithashtu një zyrë bashkëpunimi për këtë qëllim në Ambasadën e saj në Beograd.