Gjobitja e subjektit politik si mësim për të mos cenuar monumentet

Prishtinë | 09 Qer 2017 | 08:11 | Nga

Gjobitja me mjete financiare e subjektit politik që jashtëligjshëm kishte vendosur materiale propagandistike zgjedhore në kinemanë “Lumëbardhi” është mirëpritur nga aktivistët e shoqërisë civile në Prizren.

Sipas tyre, ky vendim i Panelit Zgjedhor për Ankesa dhe Parashtresa duhet të jetë shembull për parandalimin e cenimit apo dëmtimit të objekteve të trashëgimisë kulturore, shkruan sot Koha Ditore.

“Gjobitja e subjektit politik për panon e vendosur në murin e kino ‘Lumëbardhit’ duhet të shërbejë si mësim për të gjithë se monumentet e kulturës nuk bën të cenohen. Madje duhet të jetë shtytës për të gjitha autoritetet që tani e tutje të shtojnë vëmendjen dhe veprimet ligjore në këtë drejtim”, ka thënë Hajrulla Çeku nga organizata joqeveritare “EC Ma Ndryshe”.

Me një qëndrim të tillë pajtohet edhe Ares Shporta nga fondacioni “Lumëbardhi”, i cili menaxhon kinemanë me të njëjtin emër në Prizren. “Ky është ndër rastet e rralla të gjobitjes për cenim të monumenteve kulturore. Mendoj që është shembull i mirë dhe shpresoj që të njëjtën gatishmëri do ta shohim edhe në rastet kur ka më pak vëmendje mediale dhe të shndërrohet në praktikë”, ka deklaruar Shporta. (KohaDitore)

Fjalë Kryesore:

Të ngjashme