Kryetari i Aleancës, Ramush Haradinaj, e ka quajtur kryeministrin Albin Kurti “shef i të korruptuarve” dhe e akuzoi se po i mbron dostat.

Ish-kryeministri i bëri komentet në seancën e jashtëzakonshme të Kuvendit të Kosovës, i cili po diskuton lidhur me zhvillimet në Korporatën Energjetike të Kosovës (KEK) dhe përgjegjësinë e institucioneve qendrore në sektorin energjetik. Debati u thirr pas arrestimit të kryeshefit të KEK-ut Nagip Krasniqi, që dyshohet për disa kontrata njëburimore.

Haradinaj tha se Qeveria Kurti ka në model “lidhjen e shkurtër të korrupsionit”.

“VV ka aplikuar një model korruptiv, i cili model i del nga kontrolli, pra po flasim për një model të veçantë dhe quhet ‘lidhje e shkurtër i korrupsionit’. Kurti e kanë për caktim lidhjen e shkurtër të korrupsionit. Kurti i ka intervistuar edhe anëtarët e bordit nëpër ujësjellësa”.

“Ju mund të thoni se Kurti nuk është i korruptuar por ai është shefi i të korruptuarve. Ai ka menduar se vetëm dostat e tij janë të pakorruptuar. Në kohën kur Prokuroria i ka marrë nga Qeveria dosjet e veteranëve, deputetët e këta ministra kanë dalë në krah të prokurorit”, tha Haradinaj.

“Ai e din se çka po dëshiron dhe këtë po e bën për dostat e tij. Një ditë do të jesh edhe t’i me dostat e tu. AAK do ta ballafaqojë këtë Qeveri. Kryeministër mos u bën me dostat por bëhu me prokurorin”, tha ai.