Së bashku me kandidatin për kryetar të Prishtinës nga radhët e AAK-së, Arbër Vllahiun, Haradinaj ka vlerësuar se miratimi i këtij ligji, do ta dallojë kryeqytetin nga qytetet e tjera në vend.

Me këtë ligj, sipas të parit të AAK-së, Prishtina do të ketë kompetenca më të mëdha në shumë fusha.

“Në ditët e para të qeverisjes sime është dorëzuar në Kuvend ligji për Prishtinën. Ka disa vite që ka pritë në sirtarë, ndërsa për pak ditë, kjo punë u krye. Ligji për Prishtinën shumë shpejtë do të miratohet, sepse një ligj i tillë i duhet kryeqytetit,” ka thënë Haradinaj.

Ai ka kritikuar qeverisjen e deritashme të udhëhequr nga kryetari Shpend Ahmeti, duke shtuar se pushteti në kryeqytet nuk mbahet me sigurimin e kifleve.

“Kiflet edhe shujta janë diçka primare, më larg se kiflet duhet të kujdesemi për sigurinë, ekonominë etj. Me kifle nuk merren votat”, ka thënë Haradinaj.

Kandidati i kësaj partie për të parin e kryeqytetit, Arbër Vllahiu, ka shpalosur programin e tij, ku tha se Prishtina ka nevojë për një qeverisje transparente dhe llogaridhënie.

“Kemi hyrë në garë për të treguar që qytetit kurrë nuk i ka dal kush zot. Kryeministër qytetit i duhen orët tuaj për të bërë ndryshimin. Ndryshimi ka ardhur me ju me ne. Qyteti ka nevoje për një qeverisje transparente dhe llogaridhënie. Qeverisja lokale do të jetë partner i fuqishëm me qytetarin për të ndërtuar konceptin e qytetit të përparuar”, ka thënë Vllahiu.