Kryetari i Prizrenit, Mytaher Haskuka, ka njoftuar përmes llogarisë së tij në Facebook se nuk i është lejuar kalimin nëpër Serbi dhe është kthyer prapa nga policët serbë, njofton Klan Kosova.

Siç tregon Haskuka, ai ishte duke udhëtuar për në Kroaci.

“Para pak kohësh qyteti i Osijekut në Kroaci më ftoi në vizitë pune. Edhe pse nuk kam kaluar ka Serbia më shumë se 20 vjet, me rekomandim të ambasadës së Kosovës në Kroaci, vendosëm të udhëtonim nga Serbia”, shkruan Haskuka në Facebook.

“Momentin që arritëm në kufi, policët serbë kërkuan që të parkonim veturën dhe të presim. Pasi që na lënë rreth një orë të presim, njëri nga policët u afrua dhe kërkoi që ta shoqëroja deri në zyre”.

“Aty më tha që e kam të ndaluar hyrjen në Serbi. Kur e pyeta pse, më tha që nuk mund të më tregoj, por që nuk mund të kaloj kah Serbia dhe duhet të kthehem menjëherë prapa dhe që duhet të ndihem me fat ngase kisha mundur të kaloja edhe më keq”.

“Pasi që na kthyen prapa, vendosëm të shkojmë në Osijek ka rruga e gjatë, kësaj here kah bregdeti edhe pse rruga ishte trefish më e gjatë”.

“Natën vonë kur arritëm në Osijek, pash lajmet që çetnikët serbë festonin humbjen e tyre në Gazimestan”.

“Parullat e njëjta të viteve të 90-ta, “Kosova është Serbi” dhe thirrje për mobilizim nga patriarkët ortodoksë serbë për ta kthyer “djepin” e Serbisë”.

“Çfarë normalizimi me Serbinë? Në 20 vjetët e fundit, me ndihmën e pushtetarëve tanë të korruptuar dhe me bisedime në Bruksel kemi normalizuar fashizmin serb ndaj Kosovës”.

“Ata të diskriminojnë të kthejnë nga kufiri pa arsye, ndërsa ne ju lejojmë demonstrimin me simbole fashiste njerëzve që kanë kryer masakra në Kosovë”.

“Për më keq, fashizmi dhe racizmi serb ndaj Kosovës, u normalizua jo vetëm në Serbi, por edhe në institucionet ndërkombëtare, ashtu si na e vërtetoi edhe vendimi i fundit i FIFA-s, lidhur me simbolin e shqiponjës”.