Ministrja e Drejtësisë, Albulena Haxhiu ka thënë ndër prioritetet e qeverisë në fushën e drejtësisë, është  rishikimi i procesit të funksionimit të ligjit dhe vettingu , luftimi i krimit dhe korrupsionit si dhe adresimi i krimeve të luftës raporton Ekonomia Online.

Ajo tha se përmes vettingut synojnë kthimin e besimit të qytetarëve në sistrmin e drejtësisë.

Në tryezën e organizuar nga Grupi për Studime dhe Juridike (GLPS), me temë: Sundimi i ligjit në Kosovë, prioritetet e qeverisë së re”, Haxhiu tha se dokumenti për vettingun që kanë punuar përmban ndryshime kushtetuese.

“Qeveria jonë aktualisht përballet me shumë sfida, por që me vullnet do punojmë në këto sfida dhe kjo mund të bëhet me të gjithë bashkërisht. Disa nga prioritetet e qeverisë tonë, është rishikimi i tejzgjatur i funksionimit të ligjit, proces që ka nisur para tre viteve dhe është në prag finalizimi, edhe pse nuk ka qenë proces i nisur nga qeveria jonë, ne do ta shtyjmë përpara sepse ka rëndësi te madhe. Si prioritet i dytë, është procesi i vetingut në ministrinë tonë, ku kemi punuar me një dokument. Ky dokument ka pasur për qëllim një çështje me atë se vettingu a duhet të bëhet me ndryshime kushtetuese apo me ndryshime ligjore. Për këtë na duhen edhe mendime nga shoqëria civile. Nëse e them mendimin tim dhe të Qeverisë më i fuqishëm do të ishte me ndryshime kushtetuese por rezervat janë vështirësia e kalimit të amandamenteve në Kuvendin e Kosovës duke ditur që duhen 2/3”. Qëllimi kryesor i joni është që të premten ne synojmë që me këtë proces të vetingut ta kthejmë besimin në sistemin e drejtësisë”, theksoi ajo.

 Ajo përmendi luftën kundër krimit të organziaur dhe korrupsionit si proces tjetër të rëndësishëm.

“Lufta ndaj krimit të organizuar dhe korrupsionit, është çështje tjetër duke përfshirë këtu krijimin e koncept dokumentit tonë që kemi bërë gjatë qeverisjes tonë, dhe me pak ndryshime po ai dokument është vënë në votim dhe kemi tashmë këtë koncept dokumentin për konfiskimin e pasurisë te pajustifikueshme, që është dokument shumë i mirë.”, deklaroi ajo.

Ndër prioritetet tjera sipas Haxhiut është edhe adresimi i krimeve të luftës.

“Krimet e luftës janë të ndjeshme të adresohen nga një numër kaq i vogël i prokurorëve. Tjetër prioritet por jo më pak i rëndësishëm është adresimi i dhunës në familje dhe dhunës në baza gjinore. Kam hall të madh për rastet që neglizhohen nga Policia, Prokuroria dhe Gjykatat. Është e papranueshme që dikush që bart petkun e policit, prokurorit e gjykatësit një rast të dhunës së familjes ta trajtojë si çështje private, kjo është çështje institucionale”, ka thënë ajo.

Ndërsa, gazetari Besnik Krasniqi tha që pret ndryshime në sistemin e drejtësisë, d

“Rroftë ndryshimi,  e them jo në këndvështrim politik, por ndryshimet që presim në sistemin e drejtësisë, pasi dihet pushteti i sistemit gjyqësor kapet me te dobëtin, por jo aty ku duhet”, tha ai.

Sipas tij, Institucionet e Kosovës deri sot nuk kanë krijuar një databazë ku mund të jenë të dokumentuara vrasjet, dëmet e dokumentimit te asaj se çfarë ka ndodhur gjatë luftës në Kosovë.

“Institucionet e Kosovës deri sot nuk kanë krijuar një databazë zyrtare ku mund t’i kemi të dokumentuara se sa vrasje kanë ndodhur gjatë luftës në Kosovë e asgjë”, u shpreh ai.

Rreze Hoxha- Zhuji  nga GLPS -ja tha se nevoja për një reformë qenësore dhe të thellë të sundimit te ligjit nuk do diskutim. Sipas saj ndryshime duhet të ketë tek pjesa e vettingut dhe kush parashihet të përfshihet.

“Nevoja për një reformë të thellë e qenësore të sundimit të ligjit nuk do diskutim. E para ka të bëjë se cilat kategori duhet të jenë pjesë e vettingut, si duhet krijohet ky mekanizëm, rezultati etj. E fillova me këtë pasi është një ndër prioritetet kryesore të qeverisë, por që mendoj këtu nuk duhet të jenë vetëm gjyqtarët dhe prokurorët, por edhe AKI, Policia dhe shumë akterë tjerë që të gjithë të kontribuonin në sistemin e drejtësisë”, tha ajo.