Ministrja e Drejtësisë, Dhurata Hoxha, ka takuar sot shefin e ri të Zyrës diplomatike të Mbretërisë së Belgjikës, Jean Louis Servais me të cilin diskutoi për thellimin e bashkëpunimit.

Ministrja Hoxha vlerësoi bashkëpunimin e ndërsjellë dhe theksoi se mbështetjen e Belgjikës për drejtësinë e Republikës së Kosovës si shumë të vlershme dhe të mirëseardhur.

Bashkëpunimi bilateral në drejtësi, në veçanti për lëndët penale, civile dhe çështjen e ekstradimit, të zhvilluar deri më tash është bërë mbi bazën e besimit reciprok, kjo çështje mund të avancohet me marrëveshje bilaterale.

“Bashkëpunimi në drejtësi do të thellohet duke krijuar marrëveshje bilaterale. Marrëveshjet e reja janë te domosdoshme, si për ndihme juridike që do t’i definonin, harmonizonin dhe lehtësonin procedurat dhe do te siguronim një bazë të qëndrueshme ligjore për bashkëpunim juridik”, theksoi ministrja Dhurata Hoxha.

Shefi i Zyrës diplomatike të Mbretërisë së Belgjikës, z. Jean Louis Servais, shprehu gatishmërinë e bashkëpunimit në mes dy vendeve dhe theksoi se Mbretëria e Belgjikës do të vazhdojë të përkrahë Republikën e Kosovës në avancimin e mëtejmë të proceseve demokratike, në veçanti drejtësisë duke ngritur marrëdhëniet me marrëveshje bilaterale.