Ministrja e Integrimit Evropian, Dhurata Hoxha priti në takim ambasadorin e Republikës Federale të Gjermanisë në Kosovë, Christian Heldt me të cilin diskutoi për Raportin e vendit të Komisionit Evropian, procesin integrues, të arriturat dhe sfidat e këtij procesi.

Ministrja Hoxha, theksoi se raporti për vendin, është objektiv dhe udhëzues, gjithëpërfshirës në qasjen sektoriale, me të arriturat dhe sfidat e procesit integrues.

“Njohja e të arriturave në raport, nuk na bëjnë të ndalemi. Kemi vërejtjet brenda raporti që së shpejti me Kryeministrin do t’i adresojmë. Nga kjo përgjegjësi e procesit nuk përjashtohet askush, as institucionet ekzekutive, ligjvënësit, gjyqësori, OJQ-të dhe mediat por edhe opinionbërësit. Po ashtu, kemi nevojë për mbështetjen e miqve tanë që liberalizimi i vizave të arrihet sa më shpejt. Detyrat tjera nga raporti, janë prioritet yni si MSA-ja, Reforma e Agjendës Evropiane dhe reformat ekonomike”, theksoi Hoxha.

Ndërsa ambasadori Heldt, theksoi se Gjermania me vëmendje po përcjell zhvillimet në Kosovë, duke ofruar mbështetje të fuqishme në procesin integrues dhe perspektivën evropiane të Kosovës.

Sektorët e veçantë, të cekur në raport, theksoi Ambasadori Heldt, luftimi i krimit të organizuar dhe korrupsionit, duhet të jetë i vazhdueshëm, po ashtu, kjo do të arrihet nëpërmjet reformave të cilat përshpejtojnë procesin integrues të Kosovës, duke i zbatuar ato me vendosmëri.

Ministrja po ashtu, në takim me ambasadorin gjerman Heldt, e diskutoi çështjen e konsensusit nacional në procesin integrues, sepse, ne nuk kemi alternativë sa i takon të ardhmes tonë, e cila është brenda Bashkimit Evropian dhe vlerave demokratike të saj.