Policia e Kosovës, është një institucion i cili sfidat e këtij viti i ka kaluar me sukses, ndërkaq eprorët bëjnë veprime që mos të lejojnë individ për të sfiduar imazhin e policëve.

Kështu ka thënë Ministri i Brendshme, Skender Hyseni, në ceremoninë e fundvitit të Policisë, ku u prezantuan të arriturat gjatë vitit 2016.

Ministri Hyseni ka theksuar se në këtë institucion ka edhe zyrtarë që nuk e kanë bërë punën siç duhet.

“Ka pasur ndonjë te metë, pjesëtar që jo gjithmonë ka qenë në nivel të policit siç i ka hije. Eprorët po bëjnë veprime që mos të lejojnë individ për të sfiduar imazhin e policëve. Ky është vlerësim i institucioneve ndërkombëtarë vëzhguese të policëve. Duhet përmendur vlerësimi i AI që vlerësoi Policinë e Kosovës me të mirën në rajon”, ka deklaruar Hyseni.

Ai thotë se është moment solemn kur do të vlerësojnë punën e policëve dhe kur duhet të betohen se do të jenë gardian të mbrojtjes së ligjit.

“Ne do të mbesim të përkushtuar që mos të lejojmë askënd të marr ligjin në duar, sepse aty ku lejohet hierarkia ai vend e sfidon lirinë e vet. Kosova nuk e ka përmbyll ende procesin e shtetndërtimit”, ka thënë ai.

Ndër të tjerash, Hyseni e ka përgëzuar policinë për punën që ka bërë gjatë vitit, dhe ka uruar që viti 2017 të jetë më pak sfidues.

Ai po ashtu e ka vlerësuar punën e policisë në luftën kundër korrupsionit dhe të gjitha llojeve të krimit.

“Keni bërë punën të shkëlqyeshme kundër terrorizmit luftimit të gjitha llojeve të krimit, uroj të keni më pak punë në vitin 2017 dhe më shumë kohë për vete e familje të cilëve ndonjëherë u keni munguar, por të jeni të sigurt që ia ka vlejtur”, ka deklaruar ministri Hyseni.