Ish-zëvendëssekretarja e përgjithshme e NATO-s, Rose Gottemoeller, ka thënë se është “skeptike” se forcat ruse do të “fitojnë shumë sukses” në një sulm ndaj kryeqytetit të Ukrainës, Kiev.

Një kolonë masive e forcave ruse të grumbulluar jashtë qytetit besohet se është shpërndarë, në përgatitje për një avancim. Por Gottemoeller thotë se mendon se kjo mund të merret si një shenjë dobësie.

“Po pyes veten nëse ata kanë aftësinë për t’u rigrupuar në këtë pikë, sepse logjistika e tyre është në gjendje kaq të keqe, ata nuk kanë me të vërtetë furnizimet me karburant që u nevojiten për një shtytje në Kiev”, i tha ajo BBC Radio 4 Today.

Gottemoeller thotë gjithashtu se raportimet që luftëtarët nga Siria mund të rekrutohen për të luftuar përkrah Rusisë në Ukrainë tregojnë “qasjen barbare ndaj këtij pushtimi” të marrë nga Moska.

Rusia thotë se ka 16 mijë vullnetarë në Lindjen e Mesme të gatshëm për të luftuar dhe ShBA-ja beson se këta mund të përfshijnë sirianë të aftë në luftime urbane.

“Ata janë grupe ekstremiste – ata janë njerëz që kanë luftuar në Siri, ata janë disa nga ekstremistët më të dhunshëm që janë hasur në luftë”, thotë Gottemoeller.