Ivanka Trump ka thënë se babai i saj, Donald Trump është President i Paqes.

Madje ajo ka përmendur edhe marrëveshjen Kosovë-Serbi, duke e vlerësuar se babai i saj ka bërë paqe mes dy vendeve.

Këto vlerësime, Ivanka Trump i bëri në rrjetin social “Twitter”. Ajo përmendi normalizimin e marrëdhënieve mes disa shteteve si Izrael e Sudan.

Më 4 shtator, në prezencë të presidentit Donald Trump, kryeministri i Kosovës, Avdullah Hoti dhe presidenti i Serbisë, Aleksandar Vuçiq, nënshkruan dokumente të ndara për normalizimin ekonomik.

Marrëveshja përfshin një sërë projektesh ekonomike, si ndërtimi i autostradës, i linjës hekurudhore dhe nisja e fluturimeve Prishtinë-Beograd. Në këtë marrëveshje, palët po ashtu janë pajtuar që SHBA-ja të kryejë studim fizibiliteti në Liqenin e Ujmanit me “me qëllim të përdorimit të përbashkët të Liqenit të Ujmanit, si furnizues i sigurt i ujit dhe energjisë”.