Zyra e kryeministrit izraelit Benjamin Netanyahu thotë se po e thërret ekipin e saj të negociatorëve të armëpushimit në Doha të Katarit në Izrael, ka raportuar BBC.

Në një deklaratë, zyra e kryeministrit thotë: “Në dritën e përgjigjes së dhënë nga Hamasi këtë mëngjes, është vendosur që ekipi negociator të kthehet në Izrael për konsultime të mëtejshme.

“Ne i vlerësojmë përpjekjet e ndërmjetësve të Katarit dhe Egjiptit dhe përpjekjet e të dërguarit Witkoff për të sjellë një përparim në bisedime.”

Më herët këtë muaj, zyrtarët palestinezë i thanë BBC-së se negociatat midis Izraelit dhe Hamasit në Katar mbi një armëpushim të ri në Gaza dhe marrëveshje për lirimin e pengjeve ishin në prag të kolapsit.

Diku tjetër, i dërguari i SHBA-së për Lindjen e Mesme, Steve Witkoff, është sot në Itali për t’u takuar me zyrtarë të lartë izraelitë dhe katarë për të diskutuar mundësinë e një armëpushimi midis Izraelit dhe Hamasit.