E marta ose e mërkura pritet të jenë ditët vendimtare që do të vendosin për fatin e marrëveshjes për shënimin e vijës kufitare me Malin e Zi.

Kështu kanë konfirmuar burime të gazetametro.net brenda Kuvendit të Kosovës, të cilët kanë bërë me dije se më së largu kjo do të jetë java që do të përmbyllet çështja e demarkacionit.

‘Nesër ose pasnesër sqarohet gjithçka besoj. Këtë javë përmbyllet gjithqysh puna e demarkacionit’, thotë burimi i Metros në Kuvendin e Kosovës.

Ndërkaq, ka një dilemë se a do të kalojë apo jo kjo marrëveshje, pasi tani në PDK nuk është disponimi i njëjtë si në javët e kaluara. Metro mëson që LDK i ka njoftuar degët e saj se demarkacioni shkon këtë javë në Kuvend, mirëpo janë skeptik se a do të marrë votat e duhura.

Brenda LDK-së i kanë thënë Metros se LDK-ja ka arritur më në fund në një konsensus për ta votuar demarkacionin. Të gjithë deputetët e LDK-së njëzëri do ta votojnë marrëveshjen, me përjashtim të Shpejtim Bulliqit, i cili akoma nuk është bindur.

‘LDK-ja ka arrit konsensus të brendshëm për këtë çështje. Marrëveshja për demarkacion do shkojë me një aneks të shkurt. Veç Bulliqi nuk është i sigurt, të tjerët të gjithë’, ka thënë burimi.

Ndërkohë, nesër pritet të kuptohet a do të vijë në vizitë për vizitën e dytë diplomati amerikan, Hoyt Yee, i cili në vizitën e parë bëri thirrje që të votohet demarkacioni.

Ndryshe, marrëveshja e demarkacionit ka mbetur pa u votuar për gati 2 vite, pasi opozita po e kundërshton hapur, ndërkohë që ka qenë edhe një numër i konsiderueshëm i deputetëve të partive në koalicion që e kundërshtonin këtë marrëveshje.

Për t’u votuar demarkacioni kanë kërkuar edhe përfaqësues të lartë të BE-së, pasi siç thonë ata është kushti i fundit për liberalizim të vizave.