Hetimi me masa të fshehta që ka nisur rreth një muaj më parë lidhur me një rast të shantazhit që dyshohet se ka ndodhur në Skenderaj ka rezultuar me sigurimin e provave për përfshirjen e një 34-vjeçari në këtë rast.
Ai u arrestua nga policia rreth një muaj pasi u denoncua nën dyshimet se me qëllim të përfitimit të kundërligjshëm të dobisë pasurore, e ka kushtëzuar viktimën duke i kërkuar para në këmbim të mospublikimit të një materiali që ka poseduar.
Sipas të dhënave,bëhet fjalë për një video, që prish imazhin dhe integritetin e viktimës, për të cilën ai dyshohet se kishte kërkuar hiç më pak se 10 mijë euro që mos ta publikojë në faqet e tij.
Pas raportimit të rastit, Policia në koordinim me Prokurorin e Shtetit kanë ndërmarrë veprimet e nevojshme, ku ndër të tjera janë aplikuar edhe masat e fshehta, që çuan në arrestimin e të dyshuarit.
I njëjti është shoqëruar gjatë ditës së djeshme në Polici, ku është intervistuar lidhur me veprën me të cilën ngarkohet.
Ndaj tij, sipas sinjalit është urdhëruar masa e ndalimit policor dhe brenda afatit ligjor pritet të ushtrohet kërkesa për caktimin e masës së sigurisë.