Kina u ka kërkuar disa misioneve të huaja që shfaqin flamujt ukrainas në Pekin që të mos tregojnë “propagandë të politizuar”, kanë thënë diplomatët.

Shumë misione në Pekin ngritën flamurin ukrainas ose shfaqën imazhin e tij në pankarta pas pushtimit të Rusisë.

“Ne dhe të tjerët morëm një letër që u bën thirrje ambasadave dhe zyrave përfaqësuese që të përmbahen nga përdorimi i mureve të jashtme të ndërtesave të tyre për ‘propagandë të politizuar’,” i tha Reuters një diplomat, ambasada e të cilit shfaq një imazh të flamurit të Ukrainës, shkruan Skynews, përcjell Klankosova.tv

Zyrtari, i cili foli në kushte anonimiteti, tha se zyra kishte ndërmend të përmbushte kërkesën.

Tre diplomatë të tjerë me bazë në Pekin thanë se kishte pasur një njoftim që, megjithëse nuk përmendte drejtpërdrejt flamurin e Ukrainës, synonte qartësisht këtë.