Deputetja Mimoza Kusari-Lila, e cila ka qenë ministre e Tregtisë dhe Industrisë, ka komentuar vendimin e Qeverisë së Kosovës, për vendosjen e masës mbrojtëse prej 10% për produktet e importuara nga Serbia dhe Bosnja e Hercegovina.

Kusari-Lila ka akuzuar kryeministrin Haradinaj se po iu hedh hi syve qytetarëve. “Ky vendim u tha nga Kryeministri Haradinaj se “u mor si sanksion ndaj sjelljeve armiqësore që ka shteti serb ndaj Kosovës”. Nga ky vendim janë të përjashtuara brendet ndërkombëtare që prodhohen në Serbi”.

“Se Serbia meriton masa ndëshkuese për sjelljen e saj, tashmë është lajm i vjetër, por të paktën Qeveria e Kosovës të kishte guxim dhe vendosmëri e edhe pak shumë logjike ekonomike të bënte këtë veprim si duhet”.

“Mashtrimi 1. Me vendosjen e masës 10% nga ana e Kosovës, Serbia dhe kompanitë serbe nuk do ta ndiejnë sanksionin e qeverisë së Kosovës. Shumica e kompanive serbe tashmë kanë stoqe në Kosovë, ndërsa rritjen e çmimit prej 10% kur stoqet të mbarojnë, do ta paguajë konsumatori Kosovar me rritje 10%”.

Me fjalë tjera, sipas Kusarit-Lilës, Qeveria e Kosovës me këtë masë e ndëshkon qytetarin e Kosovës.

“Mashtrimi 2. Përjashtimi i produkteve të kompanive ndërkombëtare në Serbi. Në vitin 2011 masa ndëshkuese për Serbinë ishte mbyllja e kufirit për produktet serbe, pa marrë parasysh origjinën e kapitalit të kompanive, POR, origjinën e mallit”.

“Dëmi Serbisë i bëhet kur kompanitë e huaja ikin nga Serbia se nuk është vend i sigurt për të operuar, sikur ndodhi me disa kompani të cilat si rezultat i masave të reciprocitetit të vendosura nga Kosova në 2011-ten u zhvendosën në Maqedoni”.

“Nëse Qeveria e ka seriozisht masën ndëshkuese për Serbinë, le ta bëj sikur e bëra unë në 2011-ten. Ta mbyll kufirin në tërësi për produktet Serbe, pa përjashtim dhe pa frikë. Serbia dhe Bosnja do të jenë ato që do të kërkojnë bisedime dhe marrëveshje nga presioni që do të ju vie atyre nga kompanitë e tyre”.

“Apo Qeveria e vuri këtë masë në mungesë guximi për sanksion të mirëfilltë ndaj Serbisë dhe për konsum të politikës ditore”.

“Mashtrimi 3. Natyrisht se nuk është në interes të kryeministrit Haradinaj dhe qeverisë së tij të ndëshkojë kompanitë dhe produktet serbe, duke e ditur se mbështetësit dhe njerëzit më të afërt të tij, janë ose përfaqësues ose afarojnë me kompanitë serbe”, ka shkruar deputetja dhe kryetare e subjektit politik Alternativa.

“Përpjekje e lodhët e Qeverisë Haradinaj. Kryeministër, provo diçka tjetër se kjo masë nuk do të dhezë askund”, ka përfunduar ajo.