Komuna e Vushtrrise ka lansuar të martën platformën digjitale për regjistrimin e diasporës, që ka për qëllim ofrimin e bashkëpunimit me bashkatdhetarë në të gjitha fushat, si arsim, kulturë, shëndetësi, ndërmarrësi, biznese etj, raporton Ekonomia Online.

Aty u tha se kjo qasje e re do t’ia lehtësojë Komunës së Vushtrrisë komunikimin, koordinimin dhe bashkëpunimin me diasporën, ndërsa bashkatdhetarëve do t’iu hapet mundësi për pjesëmarrje përmes ideve, politikave e deri te investimet.

Kryetari i Vushtrrisë, Ferit Idrizi, e quajti shumë domethënës këtë platformë, me ç’rast tha se do t’u ndihmojë shumë bashkatdhetarëve.

Me këtë rast, Idrizi u shpreh i lumtur që po zotohet edhe një premtim i tij elektoral, duke e bërë Vushtrrinë si Komuna e parë me platformë të tillë.

“Jemi të lumtur të gjithë në Komunën e Vushtrrisë sepse po e inaugurojmë platformën për regjistrimin e diasporës që është një projekt jashtëzakonisht domethënës për të krijuar një databazë në mënyrë që ta kemi një pasqyrë të qartë të diasporës vushtrriase, me tregues të matshëm numerik, që ta dimë kapacitetin e tyre ekonomik dhe intelektual, në mënyrë që Komuna e Vushtrrisë të ofrojë bashkëpunimin dhe mundësinë e bashkëpunimit”, tha Idrizi.

“Jeni Komuna e parë në Kosovë që e kemi hartuar këtë platformë në mbështetje të CARITAS-it zviceran dhe që ishte një zotim dhe premtim i imi elektoral dhe tani është bërë realitet”, tha tutje Idrizi, teksa bëri thirrje diasporës që të regjistrohen në këtë platformë.

E prezantimin e platformës e bëri Liridon Kastrati ekspert i fushës.

“Kryetari e kishte një ide të mrekullueshme me kriju një platformë që diaspora me u angazhu dhe me dhanë interesin e tyre në këtë Komunë”, tha Kastrati.

E Sylë Ukshini nga Ministria e Jashtme dhe e Diasporës, kërkoi që Komuna e Vushtrrisë të merret shembull nga komunat e tjera.

“Unë mendoj se kjo platformë e ndihmon në afrimin e bashkatdhetarëve dhe të gjithë kjo bëhet një instrument shumë i fuqishëm për të ditur kapacitetet e diasporës së Komunës së Vushtrrisë. Këtë platformë do duhej ta kishin të gjitha komunat tjera dhe ta bënin një qendër që përmes Ministrisë së Jashtme pastaj do përdorej për qëllime të ndryshme si kulturore dhe në njohjen e kapaciteteve tona”, tha ai.

Kjo është vegza ku mund të regjistrohen bashkatdhetarët: www.diasporaevushtrrise.org