Kryeministri Ramush Haradinaj, ka njoftuar se javën e ardhshme Kosovën do të vizitoj Këshilli i NATO-s.

“Më lejoni t’ju njoftoj se gjatë javës që vjen do të kemi vizitën e Këshillit të NATO-së në Kosovë”, tha Haradinaj.

Ai gjithashtu tha se me datën 17 nëntor kongresmeni Eliot Engel, do të qëndroj për një vizitë në Kosovë, raporton Ekonomia Online.

Ai ka thënë se janë duke shqyrtuar mundësitë që të mbajnë një mbledhje të Qeverisë ceremoniale në të cilën kongresmeni do të iu drejtohet me një fjalë rasti.

“Rreth 17 nëntor do të kemi një vizitë në Prishtinë të kongresmenit amerikan Eliot Engel. Kam menduar që atë ditë të mbajmë një takim të Qeverise me një pikë solemne ku mund t’i adresohet Qeverisë kongresmeni Engel”.

Përfaqsuesi demokrat në Kongresin amerikan, njëherazi edhe nën-Kryetar i Komisionit të Dhomës së Përfaqsuesve për Politikën e Jashtme dhe njohës i mirë i çështjeve shqiptare në Ballkan, Eliot Engel ka mbajtur një fjalim mbi politikën e Shteteve të Bashkuara karshi Republikës së Kosovës në mars të këtij viti.

Fillimisht, numëroi ato që ai tha se janë suksese dhe arritje të viteve të fundit të shtetit më të ri në Evropë, duke përfshirë ndër të tjera medaljen e parë të artë olimpike të Kosovës, mbajtjen e konferencave me rëndësi ndërkombëtare mbi bashkëpunimin dhe tolerancën në fushën fetare, anëtarësimin e Kosovës në Bankën Botërore, në Fondin Monetar Ndërkombëtar dhe në ente të tjera botërore.

Engel vizitën e fundit të tij zyrtare në Kosovë e ka realizuar në qershor të viti 2015.

Haradinaj: Nga kualiteti i zgjedhjeve varet shpejtësia për të arritur të liberalizimi i vizave

Kryeministri Haradinaj ka kërkuar që të gjithë akterët e përfshirë në zgjedhjet e së dielës të punojnë maksimalisht për t’ia zbardhur fytyrën Kosovës.

Haradinaj, në mbledhjen e sotme të Qeverisë deklaroi se varësisht nga rrjedha e zgjedhjeve në Kosovë varet edhe shpejtësia e liberalizimit të vizave dhe integrimit në BE.

“Të dielën në Kosovë mbajmë zgjedhjet komunale. Falënderoj partitë politike për korrektësi dhe kujdes në fushatë. Procesi ka shkruar në rregull, i lusim partitë politike, gjithë akterët pjesëmarrës në zgjedhje që t’ia zbardhin fytyrën Kosovës me zgjedhje sa më të mira dhe me zgjedhje fer. Të mos harrojmë se edhe nga kualiteti i zgjedhjeve varet shpejtësia për të arritur të liberalizimi i vizave dhe integrimi në BE”.